Гісторыя Беларусі IX-XVIII стагоддзяў. Першакрыніцы.


Па выд.: Левшун Л.В. Леонтий Карпович. Жизнь и творчество. Мн., 2001. С. 264-280 || У гэтым выданні тэкст перадрукаваны з некаторымі папраўкамі па выданні: Хрэстаматыя па старажытнай беларускай літаратуры / Склад. А.Ф. Коршунаў. Мн., 1959. С. 297-305 || Зборнік № 357 Кіева-Сафійскага сабрання.


В неделю пред Рождеством Христовым наука блаженного пастыря отца Леона, архимандрита Виленского

День сегоднешний, православные христиане, Церков святая называет неделею пред Рождеством Христовым.

Як, бовем, в дому порядного государя вси речи суть споряженыи пенкне, и ведлуг своего часу и слушности каждая реч уживана бывает, так и в Церкви святой вси обряды и церемонии пенкне и наддер сличне споряжены суть и часу своего уживаны бывают през доброго государя Святого и Животворящаго Духа. Так и то самое не без причины деется, же празники фалебные урочистые предпразднество и попразднество мают, з которых празников хвалебных одно на том тыдню, даст Бог, праздновати будем. Тыи теды хвалебныи и урочистыи свята, для чого предпразднество и попразднество мают, з дыскурсу, даст Бог, познати и розумети может, который будет деятися на текст тепер прочитаного Евангелия, што абы с пожитком душ наших быти могло и абы умысл и сердце наше роспалилосе ку слуханю слов божественных, хотящаго родитися в яслях скотнях просити повиннисмо.

Звычай той у монархов и ксионжонт сего света заховуется, иж кгды до якого места который монарха, люб ксионже, звлаща собе подданого, хочет прыеждчати, теды впруд персон певных от себе посылает и то чинит, же лист написавши, през того же курсора впрод засылает, абы онаго места граждане, ведаючи о том, на приезд пана своего готовалися, и абы все юж приготовали, чого потребует в своем писанью.

Што все и Творец небу и земли Христос Спас наш чинити рачит, Оный Монарха найвышший, Оный Пан пребогатый, Оный Цар всими царствующий с Церковью, облюбеницею Своею, и душею каждого чловека хрестианского, иж для милосердия Своего невымовнаго и(з) неизчерпаемое пучины щедрот Своих зезволил так смиренно се знижить и упокорити Богу Отцу Своему, же кгволи подвигъненью рук Своих дела на першое блаженство и кгволи упадку народу людского зступил з маестату славы Своей на тот падол плачу и не занехал ознаймити, абы на приход Его свет тот марный, водлуг почести своей, яко найлепей могл се приготовати и яко налепей поткать на потканью Пана своего и Створителя. Пре то впрод послал прекурсоров, послал слуг Своих, послал пророков, послал патриархов, которые ничого иного не чинили, толко плачливыми прозбами своими уставичне о то просили Творца всея твари и Монарху векуистаго, абы з милосердия Своего и человеколюбия невымовнаго, ужалившися створения Своего, пришол на низкость земную и наведил людей, седячих во тьме и сени смертней. Частию теды то ознаменовали приход Царя безсмертнаго, частию теж люде ознаменовали о том, иж мает прийти Мессия правдивый, пророкованый и от всего створенья велце пожаданый, а над то Сам Бог Собезначальный Отец о том свидецство выдал, же Сына Единороднаго и Соприсносущнаго Слова мел послати з великолепное Славы Своея на землю на подвигненье человека, Который мел царство ксионженця света з кгрунту вывернути и люд з неволи окрутное шатанское высвободити.

(В ) тым теды упевняли вси пророцы. То во образах и фикгурах многих старозаконных предзначилосе. И пред близким Своим пристем послал Ангела пред лицем Своим — Иоанна Крестителя, о котором Сам Христос Спас таковое сведоцство выдает, иж нихто не повстал в рожденных женами болий Иоанна Крестителя. А при посланю того слуги якобы неякий лист послал до того места, которое з Ним в гневе было и валчило уставичне з Паном и Творцем своим. Леч што то за лист? Не инший який, толко тот, который се ласкам вашим прочитал, а тот лист зачинает святый Матфей евангелист от онаго слова: "Книга рожества Иисуса Христова, Сына Давыдова, Сына Авраамля" (Мф. 1.1).

Была теж и другая книга, которую Моисий Боговидец писал. И тая книга называлася Книгою Бытия, яко и сам автор тое книги написал: "Сия книга бытия человеча". Тая, праве, книга ест бытием человечим. В той книзе тое замыкается, яковым способом люде на свете жили, яковым способом расплодилися на земли, хто впрод по Адаме народился, и для того бытием людским тая книга называется.

Але тая книга юж не книгою Бытия называется, юж не рожене людское, але рожене Бога Предвечного под леты и Человека досконалого, Который натуру Бозства и чловеченства в одно злучил. Обедве теды книгами се называют. Леч яковая их есть компорация? О першой книзе слушне, и наддер слушне, слова пророка Иезекиля речися могут: "Видех руку простерту и се светок в ней. И написано тамо беша рыдание, плач болезни и вопль мног" (ср.: Иез. 2. 9-10). А тое власне и в оной кннзе, которую написал Мойсей Боговидец, выражалосе. Абовем на самом початку упадок продка нашого Адама описал, як стратил райское милое и сличное мешканье; выражает то, як оны кроль над всим створенем и, дивными дарами а праве неошацоваными обдареный будучи, в чести сый, не разуме приложитися скотом несмысленным и уподобися им. Выражает книга оная, як тот кроль всего створеня злуплен зостав з оных своих клейнотов, як смерть всеродная през окно вошла во мир, то ест през окно, которого не умела добре замыкати прабаба наша Евва. Выражает тая книга, яко земля проклятству вечному отдана была, а не толко тое выражает, але теж и што иншого. Описует теж и то, як невеста голос услышала, же в печали родиши чада, и як муж услышал: "В поте лица твоего снеси хлеб твой" (Быт. 3.19). То все теды в той книзе Бытия замыкает. А потом теж иншии траедии описуются, которые где ж и яковым способом сталися. Слушне теды, яко ти рекл, тая книга Бытия книгою называтися может тою, в которой описует рыдание, плач, болезнь и вопль мног.

И тая юж вторая книга не так называется, але мает иншое назвиско, инакший тытул, называет, бовем, Евангелие, то ест весолая новина и пожаданая, тая новина, которую прагнули слышати пророци, патриархи, почавши от перваго Адама аж до второго — Самого Христа Спаса, и з плачем очекивали. Там тая книга назвиско свое от земли мает для того, же Адам перший от земли ест створен, а овая зась другая книга от неба назвиско мает, бо и Адам вторый Господь есть небесный, Который по то зступил на землю, абы чловека вознесл на первое блаженство. Там тот перший Адам позбыл райского утешения, постратил тех потех и нас всих от них быти отдалил, а овый, вторый щасливый Адам по то пришол, абы з низкостей земных нас всих на высокое мейсце запровадил.

Весолая теды тая и наддер весолая новина! А зали, бовем, могла бы быти веселша и утешнейшая новина тому месту, которое будет во обложенью от неприятелей и в великом небезпеченстве, же тот монарха, который место оное облегл, отпускает вси каранья, всих горлом дарует, а не толко тое чинит, але хочет имети каранья з тым местом, зповиноватити и приязнь зарвати? Тое ж и Христос Спас наш, Оный найвызший Монарха, учинил, иж кгды мы за претяжкие грехи наши заслужили были помсту и каранье, заслужили были муки векуистые, теды Он на тот час з милости Своей невымовное тую новину до нас послал, же не толко за грехи каранье отпускает, але еще таковые дары и таковый упоминок посылает, же з нами в ласце жити хочет, же з натурою нашею хочет ся сповиновати и грехи натуры нашое, на Себе принявши, загладити. Так бовем рек о Нем прекурсор Его святый Иоанн Креститель; "Се Агнец Божий, вземляй грехи всего мира" (Ин. 1. 29). Сам греха не сотворил, як мовит пророк Исайя, и не знайшлосе фалш во устех Его. И для того апостол Павел мовит: "Христос искупил ны ест от клятвы законные, Сам бо по нас бысть клятва" (Гал. 3. 13).

А хто ж бы з вас, православныи христиане, новины тое не принял вдячне? Хто бы не тешился и не веселился, слышечи тую весть пожаданую? Хто бы не благодарил Бога за тые Его невымовные дары? Нехай теды собе каждый з нас на уме своем и на сердцу то имагинует, же если бы за того веку был, которого Христос Спас наш под леты народитися рачил от Пресвятой и Преблагословенной Марии, а кгды бы ему, яко пастыром през ангелы, тую новину ознаймено, и зали каменное сердце люб над самые опоки твердейшое мел бы, абы ся не утешил, и зали так озяблая душа была бы, абы ся не роспалила огнем любви Божой? Не розумею, абы кто из вас так запамятливого и окаменелаго мел сердца быти.

Вси теды маете то уважать и о том ведати запевне, же што там на он час, тое власне и тепер деется. Церковь святая, Матка наша, рочным обходом света фалебныи целебрюет. Не без причины то чинит, же на каждый рок памятка преславного Рожества Христова обновляется. Обновляется теды памятка Рожества Христова на каждый рок, а затым теж обновляется и околичность часов. Яко Солнце материальное, створеное от Бога, почало моц свою выконывати на тот час, скоро было створоно, то ест почало вси речи, древа, поля, кветы и все створене оживляти, так и тепер, кгды знову рочный обход приходит, теды знову показует скутки, оным подобные, и так знову все створене оживляют, же и древа моц и оздобу свою приймуют, кветы также и иншие тым подобные речи, которые суть створеные под солнцем. А если Слонце чувственное, Солнце материальное, таковой моци ест, будучи на том видимом небе, далеко болш оное мысленное Солнце правды Христос Спаситель наш, Которое уставичне лучами благоразумия Своего просвещает и светит на той мысленной тверди, на том одушевленном небе, то ест Церкви.

Церковь, абовем, святая в письме богодухновенном называется небом. Як, бовем, там тое материальное небо мает Солнце на собе и Месяц, так и Церковь святая — мысленное небо — мает на себе мысленное Солнце, Христа Спаса, облюбенца своего, мает и Луну, то ест Пресвятую и Преблагословенную Богородицу, Которая светлость от Того мысленнаго Солнца приняла, а затым и Сама в Солнце се претворила, а яко оное небо мает на собе звезды, то ест апостолов и всих угодников божиих, которыи светят во тме неведения и заблуждения. Тое теды небо одушевленное споражоно ест ведлуг оборотов небесных и округ лету венчает, и тут теды за настаньем тых часов, кгды распаметываем таемници Рожества Христова, якобы скутки оных всих справ назад ворочаются и мощность свою выконывают.

Яко там на он час зезволил народитися в стайни быдлячой и возлещи во вертепи и в яслех скотнях,— хто теж и тут душу свою на то способную учинит и хто дом душевный выхондожит на приятие Царя новорожденнаго, теды до таковой души Тот же Монарха векуистый приходит з особливыми дарами и скарбницею добр Своих неисчерпаемых, приходит до сердца верных, которыи Его очекивают, и якобы се знову в умысле и серцах их родит.

Может теды человек християнин з дыскурсов теперешних потехи и веселия зажити, может с того прислухиванья то поймовати и уважати собе и теперь веселитися, яко тогды, кгды Христос Спас наш народити рачил. а з яковым набоженством готовал бы се на он час приняти Царя новорожденнаго, з таковым же и тепер теж умысл и серце свое готовати на принятие до душевнаго своего дому, певен того будучи, же от тых даров всих добр давци не будет упослежоный, же Тот Пан можный, же Тот Монарха найвышший, кгды ся народит в дому его душевном, обогатит дом тот упалый и згнилый Своими скарбами неошанцоваными и клейнотами дорогоценными приоздобит.

Если теды, православные христиане, хочем того доступити, если тых даров Бозских хочем статися участниками , теды приготовати и выхондожити дом наш душевный повиннисмо, абысмо так вдячного и пожаданого гостя з реверницею и радостию великою приняли. Для того теды якобы неякий лист Церков Святая, тое Евангелие нам тепер оказует, и неделя тая, которая ся неделею пред Рожеством называет, для того установлена, абы побудкою была ку лепшому приготованью. Лист тот для того впрод посланый, абысмо добре зрозумевали и каждый пунктик его добре уважили.

Для того и многие имена в той Евангелии Христовой святый Матфей евангелиста вспоминает. А то чинит впрод для того, абы оказал, же Христос Спас ест Месия правдивый, пророки проповеданый и от всих людий очекиваный, идучий с поколенья Авраамового, Давыдовых и инших, о которых там припоминает, з которого поколенья и Пресвятая Богородица народилася и Иосиф старец, который не на малженство Ей был пошлюбленый, але для захованья чистоты паненства. З поколенья Давыдового и Авраамового и инших поколений Христос народился, ачколвек то ест причиною ширшою описана genealogiey Христовой, абысмы так далеце зацности фамилии своей не уфали, але сами о тое старалися, абы своими справами и поступками знаменитыми фамилию свою приоздобляти и фамилии своей додать славы з поступков и справ своих цнотливых; абысмы не были подобни тым, о которых в гисториях читаем, иж кгды оного убогого человека богатый а до того вынеслый, як кедр ливанский, в славе и [почестях] света того споткавши, почал уругати и мовити ему, же с подлого дому естес урожоный, оный убогий тому богачу так отповедает: "Моя, прави убогая, фамилия может воздвигнутися и повстати, але твоя юж не может ся воздвигнути, але рачей упадати". А тые слова человек мовил, не будучи светлостию евангелскою освечоный. Так и Христос Спас наш ачколвек з дому королевского линию Своего рожаю мает, але не зезволил, абы вси называлися кролми, з которых поколенья Он уродился, што барзо латво Ему яко Творцу всея твари учинити было, абы и Пресвятая Матерь Его обфитовала во вшеляких достатках, але много добрых и злых и подлое кондиции людей в Своей Евангелии вспоминает, и таковых вспоминает, которые бы макулу якую на собе мели. А то для того чинит, же не встыдался наших всих дефектов и недостатков на Себе приняти. Невстыдается, яком рекл, и таковых в фамилии своей мети, которые бы якую макулу на собе мели, яко то Саломон, сын Давыдов, припоминается в его geneologiey, который спложеный ест з Вирсавии, жоны Урии новое, которую взял кгвалтем цар Давыд и в двоякий грех впал, то ест вшетеченство и забойство. А для того, абы и той не десперовал в собе.

А яко з маестату славы Своей прийти зезволил на тот час, аж впрод был очекиваный, и так до душ наших прийдет, наведит и в них ся родити зезволит, кгды впрод будет очекиваный, и того по нас потребует, абысмо впрод приспособляли, абы воздыхание наше так возсылали, абы як там не встыдался в яслях скотнях возлещи и в стайни быдлячой народитися, так и тепер, пришедши до душ наших, в них се родити зезволил, которые суть стайнею быдлячою, вертепом и яслями скотнями.

Для того теды так много фамилий вспоминает, абысмо и мы тот же афект и тое ж прагненье мели. Вспоминает впрод патриарха Авраама. Тот азали не прагнул пристя Христового? Сам Христое Спас наш о нем свидецство выдает таковое: "Авраам, отец ваш, прагнул, абы Мессию правдивого огледал" (ср.: Ин. 8. 56), абы Бога, в теле пришедшаго, обачил, еднак же не видел, ачколвек леч не истотне, але толко в фикгуре и теню. А приклад такового прагненья таковый, иж кгды принес над звыклый человечее натуры бег Исаака, сына своего возлюбленнаго, Богу на оферу, теды таковым хотел был его оферовати, али место сына своего обачил баранка, за рога звезаного в саде Савсковом, и на оферу Богу принес. И тот день, теперешний день Рожества Христова, оферовал. Если теды, в фикгурах и теню оглядавши, Авраам веселился, а мы, в самой истоте обачивши, и зали не маем ся з его веселити?

А то ж и о инших прагненью мовитсе. Давыд теж з яковым прагненьем того дня очекивал, з яковым плачем тые слова мовил: "Пасый Израиля, вонми. Внимай прави, который естес пастыром израелским и наставляеш, як овечку Иосифову" (Пс. 79. 2), а схиливши неба, зтупи на низкость земную, Который маестат маеш на херувимех и Которому маестатом ест небо, а подножком ног земля.

А што для короткости часу о Аврааме и Давыде толко мовится, то ж и о инших всих розуметися мает. Так, бовем, пречистыми усты Своими Христос Спас наш мовит: "Мнози народие восхотеша видети, яже вы ныне видете, и не видеша, а слышити, но не слышаша" (Мф. 13. 17). А пре то, мовит Христос до учеников своих: "Блажени очи ваши, яже ныне видета, и уши, яже ныне слышита" (Мф. 13. 16). Дорого бы купили тую ласку и тот час дорогий вси пророци, але, того не огледавши, поумирали. Леч еднак, яко читаем, же некоторые и по смерти жадали того, иж очима телесными видети того не могли, бы принамней на оном мейсцу кости их похованы были, которое бы Христос Спас наш, человеченство на Себе принявши, пресвятыми ногами Своими доптал. И для того Ияков патриарха сына своего Иосифа заклял был, абы по смерти не ховал его в Египте, але абы там кости перенес, кгде мел явитися Бог во плоти, и которые мейсца ногами Своими потоптати мел Мессия правдивый. Они теды подобна суть кораблем, которыи овоци розмаитые, яблока, кгрона винные, другим, а не собе везут, а сами толко вонностию и солодкостью паху их контентуются.

Так и пророци то чинили, же своим плачем, своим воздыханием сердечным якобы умысл прекланяли Единароднаго Сына и Соприсносущнаго Слова Богу Отцу, абы зступил з маестату славы Своей на низкость земную, еднак же сами очима своими того не огледали, але нам солодкость и вонность тых аромат дорогоценных показывали. И для того Исаак патриарха, сходечи с того света, мови до Иякова, альбо рачей, когда ему первенство отдавал, тые слова: "Се воня сына моего, яко воня нив полных" (Быт. 27. 27). И троха нижей: "Да ти работают языци, и да поклонят ти ся князи" (Быт. 27. 29).

Если теды, здалека еще, в образех и фикгурах старозаконных огледаючи, вси се поклоняли Оному, а мы юж тут, в новой благодати, источие видечи, и зались не маем покланяти, кгды юж не баранок фикгуральный, але Тот, Который гладит грехи всего мира, Богу Отцу приносится на оферу?

А тое все ку тому целю мовится, абысте ся яко найлепей приготовали на приход Царя рожденнаго, бо мовит еден з докторов церковных: "Елико вмистелище , толико влагалище. Як праве великое начине подаси, так много в него з даров Божиих вольется. Если умысл затарасует печалми житейскими, там юж благодать Святого и Животворящаго Духа премешкивати не может. Если сосуд вильготый и заплеснелый будет, там балсам найкоштовнейший не свойдет . Если серце твое хто инший опанует, если тобою справовати будут страсти и наметности, там юж инший господар в том дому быти мусит. Яковое бовем сполкованне Велиару со Христом?"

Леч ты глупым и шаленым застаеш, же не хочеш так гойными дарами обогачоным быти и на принятие так гойных даров начиня не даеш и заставаеш убогим, кгды не принесеш умыслу роспростертаго и спанялого, которое бы годно и способно было на принятие добр тых. Але жебысь ся в тых дарах Бозских барзей закохал, зступует Добро универсалное на низкость земную, в Котором вси потехи и вси добра замыкаются.

Приходит твой Цар, Который так ест потужный и так можный, же всю орду шатанскую звалчит и внивеч обернет, а до того добродейства невымовные оказует, же ласкаве и приятелске з тобою жити обецует. Приходит Отец Тот, Который всими достатками сынов своих опатрует. Приходит Тот Отец, Который сына марнотравного готовый ест приняти до дому Своего и в шату его первую оболакает и юж не тельца упитанного, але Самого Себе дает на том банкете преможном, на той трапезе безсмертной и готов тебе, як пеликан свое дети, кровию Своею оживляти, так и Тот мысленный кровию Своею найдорожшою, излиянною за весь мир, оживотворити. А ты того невдячным се ставаеш и всими тыми дарами Бозскими погоржаеш, и не хочеш приспособит на принятие Того Гостя милого и пожаданого.

Чи много з вас, православные християне, умысл свой приспособили а от земных вещей отдалили? Чи много з вас зезволили обмыти дом свой душевный през исповедание грехов своих и от серца истинное покаяние? Чи много з вас сосуд свой выхендожили на влитие балсаму того неошанцованого? Леч кгды было которому з вас ознаймено, же король и монарха сегосветный мает приехати до дому твоего и в ним обецне мешкати, а зали было ся не готовал на принятие до дому своего, а зали было не толко дом свой, але и себе самого приоздобил яко налепей? Для чого ж душевны дом у тебе так ест плюгавый? Чому того сосуду гнилого и заплеснелого не выхондожиш? Если на столе, або на лаве макулы якое не терпиш, а на души чому ее терпиш? Для чого доброхотне тых даров Бозских лишаешся? И зали не ведаеш, же ярмарок живота нашего барзо коротки и рихло юж скончится, а ты еще ничого не купил? Затым хотя быс тепер одну слезу з очий сердечных выпустил, теды далеко потребнейшая ест и большую вагу в собе мает, а нижли по сконченью того ярмарку реки быстроточные. Для того теды ширей лаком в то се инферует, абысте ся почували в своей повинности Христи, абы сте помнели на свою вокацыю, абы сте принамней самых иноверцев завстыдили, которые килка крот до року, альбо килканасте раз в своих синакгогах коммоникуют и оплатки полыкают. А вы, христиане титулуючися, до которых Христос Спас мовит: "Аще правда ваша не избудет паче книжников и фарысеов, не внидете во царство небесное" (Мф. 5. 20),- если праве так жити не будете, абы самое житие ваше было кшталтом и прикладом иншим, если не будете так живота своего провадити, абы и самые иноверци, видечи честное житие ваше, прославляли Отца вашего, теды лекайтеся помсты и караня от Бога. До того не только дом свой душевный очищайте, але теж и приоздобляйте его добродетельми, то ест постом, молитвами, милостынею.

А жебы той огонь любви Божое в нас не згасл, Самого Того всими царствуючаго Царя, Который гредет родитися в яслех скотнях, просимо, абы ваша серца тым огнем любви Его папалил, абы теж нам дал умысл таковый, абысмо вдячными были и годными стали тых Его даров невымовных и добродейств з неогорненого Его до нас милосердия, которое Он нам гойне и щодробливе, яко скарбница неисчерпаемая щедрот и бездна неиследимая милости, показовати рачил до того, абысте яко найлепей приготовали на принятие до душевных домов ваших Царя новороженнаго. А другие, хоч юж и короткий час, не отмовлялнся по споведи до причастя, хоть на 11 годину беспечне ся до той винници становили, але бысте ветхаго человека совлекли з похотьми его — дом душевный приготовили. Новый, абовем, Адам нового кгмаху на мешканье Собе потребует. Волаймы ж теды с пророком: "Серце чисто созижди во мне, Боже, и дух прав обнови во утробе моей" (Пс. 50. 12). Яко Тобе подобает всякая слава, честь навеки веком. Аминь.







Заправка автокондиционера подробно.        Гейзер Престиж М узнать больше.

Hosted by uCoz