Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 4. До Остафея Волловича, каштеляна Троцкого (01.III.1574).

До Остафея Волловича, каштеляна Троцкого1

Ясневельможный милостивый государю пане троцкий, пане, пане мой милостивый!

Новины, годные ведомости вашей панскей милости, пана моего милостивого, з сего краю в особливом листе моем по достатку выписавшы до всех вобец их мости панов рад Великого княжества Литовского, моих милостивых панов, через того посланца моего выслал.

Только покорне чолом бью пану моему милостивому, абы тот посланец мой, которому и в инших потребах и долеглостях моих устне росказал перед вашею милостию, моим милостивым паном, преповедеть и преложить яко о тот замок государской, так и во власной речи моей, покорне и ниско чолом бью пану моему милостивому о неомешканую отправу, абым достатечную о всё тое от вашей милости, панов рад, мел и власные потребки мои одержал.

А зособно коло того, иж овде во всих тых украинах слыхать, же е(го) к(о)р(олевская) м(и)л(ость), не хотечи длужей терпеть неприятелю и на далей перемирия откладать, але заразом почал з ним чинить.

Ото ж юж неприятель, чуючися, в том способляет и готует так, жебы теж его к(о)р(олевской) м(и)л(ости) и вашмостым паном нашым опатровать в сей час, звлаща з украины ту потреба. И обротит ли ся его к(о)р(олевская) м(и)л(ость до Смоленска? То юж перша, же у в Оршы станя так в замку, яко в месте ве дворе, часов зимных меть не буде, бо всё згнило, ни к чему приехать; есть теж, пить ничего. Чого всего сам ваша милость, мой милостивый пан, сведом быти рачыш. На то за часу потреба опатрения. А иншые всё, словне, яком вышей писал, не труднечи в(ашу) м(и)л(ость), государя моего милостиваго, писанием шыроким перед вашею милостию, моим милостивым паном, росказалом приложить.

Проше о милостивое и ласковое того посланьца моего выслухание, а особливе о милостивую оборону от овручан, о Чорнобыль. Што первей мовили, жебых я под ним упросил, а тепер, то отменилши, написали, "же им то король взял, яко властную отчызну их". А на прывилью их власном стоит: "замок наш государский". Отчызны и вечности на нем жадное не мели — в шафунку и в ревизии государской был. А теж вже через десятый год о то зешлому государю2 не впоминали, бо хотя ж ме и позывали, ино вже тая вся справа за ласкою вашей панской милости мене от пана стольника дошла пры иных. С справы тое никого не стало, а уния3 вси таковые фримарки и данины утвердила.

Государю! Борони мя, слугу, так теж покорне прошю о прычыну мандату государского с канцелярыи корунное о Кобылиньцы и Левковцы, жебых вже з ними конец прынял, коло чого справу достатечную тот выросток мой Лосятинский вашей милости, пану моему милостивому, дасть. А я все тые милостивые ласки вашей милости вечне з жонечкою моею и детками заслуговать буду.

С тым жычечи в(ашей) м(и)л(ости), моему милостивому пану добродею, в ласце божей при добром здровью во всем фортунного сполом з ей м(и)л(остию) панею малжонкою и з милым потомствем в(ашей) м(и)л(ости) в долго незамерный век панованя. Себе и службы мои милостивой ласце в(ашей) м(и)л(ости) залецам, покорне просечи, абым опущон не был.

Писан у в Орши, месяца марца 1, року 1574.


1 У выданні Археаграфічнай камісіі гэты Ліст не друкаваўся.

2 Маецца на ўвазе Сігізмунд II Аўгуст.

3 Маецца на ўвазе Люблінская унія 1569 г.


По выгодной цене лечение вросшего ногтя на ноге только в нашей компании.

Hosted by uCoz