Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 5. До панов рад Великого княжества Литовского (02.III.1574).

До панов рад Великого княжества Литовского1

Освецоные а ясневельможные, милостивые панове рада Великого княжества Литовского, панове а панове, панове милостивые!

По высланю до вашей панской милости отсюль з Оршы того хлопца моего Лосятинского сегодня, у во второк, марца второго, прислал до мене з заграничья шпег мой на имя Кузьма Труба посланьца своего, даючи знать, иж на днех теперешних блиско прошлых люду московского немалые, де, войска до Смоленска прибыли, а людей пограничных из сел от границ приставщики выгоняют до Смоленска и острог2, де, новый моцный в Смоленску почали робить. А ве (для. — А. К.) даня певнейшее лепшое ведомости тот Труба сам еще на рубежу позостал.

А я, слуга вашей панской милости, маючи таковую ведомость, того ж часу и тое годины другого есьми шпега, Олексея Надавца, там же еще до границ выслал, абы што певного и неомыльного, выведалшися, мне знать давали.

Потом, скоро по отправе тых шпегов, того ж дня, у второк, марца второго ж, другий шпег мой з другое строны, з рубежа ж смоленского, на имя Юрко Желожковец дал знать тыми ж словы, иж, де, з Смоленска приставщики смоленские — не ведати, што тому за причина — людей всих з сел з заграничья до Смоленска выгоняют. И поведал, иж ся того запевне выведал, же на тых часех, запевне, князя великого московского з сыном его меншим3 до Якимова Починку4 сподевают, и люду, де, военного немало до Смоленска прибыло. А сына, де, старшого5 князь великий посадил на царстве на Новегороде Великом.

В(аши) м(и)л(ости), панове мои милостивые, о всем том рачте ведать. А я, слуга в(аших) м(и)л(остей), што слышу, то пишу и пильность коло того овде великую чиню и штосякольвек потом поновит не омешкам вашей панскей вельможности давать знать (буду. — А. К.). Только, для пана бога, о тое прошу: отколь на таковые посылки маю на страву брать и шпегом давать? Гды ж есьми и до перших утрат моих за обытницою государя его милости зешлого6 и в(аших) м(и)л(остей) панов рад еще не пришол.

Для пана бога, милостивые панове, рачте, ваша панская милость, о том дбать, абы про який недостаток мой, не маючи где чого взять, таковых справ до двору не омешкал, а до якое неласки его королевской милости и в(аших) м(илостей) панов рад чего не уронил.

А особливе покорне прошу: рачте, ваша панская милость, выписати и науки дати, гды ж з ласки божей государя маем, и неприятель о том ве, яковым тытулом7 мaю до воеводы смоленского писати? Бо з Смоленска овде до Орши от воеводы посланники его приежджают частые, жадаючи буде якие причины около долгов, або яких скарг, а больш, абы о государю и о всяком повоженю с причин тых ведати могли. На што все мне от в(аших) п(анских) м(и)л(остей) неомешканое науки потреба. С тыми жычечи в(ашей) п(анскей) вельможности, паном моим милостивым, в ласце божей при добром здоровю фортунного панованя, себе з найпокорнейшими и унижоными службами моими милостивой ласце в(ашим) п(анским) м(илостям) пильне залецам и покорне прошу, абым опущон не был.

Писан у в Орши, месяца марца 2 дня, року 1574.


1 У выданні Археаграфічнай камісіі гэты Ліст пададзены пад № 4.

2 Астрог (астрожак) — так у XVI—XVII стст. у рускіх называўся ўмацаваны пункт (горад, паселішча) або драўляная сцяна з укапаных ушчыльную і завостраных зверху слупоў вакол крэпасці.

3 Маецца на ўвазе царэвіч Фёдар Іванавіч, якога частка сенатараў Вял. кн. Літоўскага хацела абраць каралём Рэчы Паспалітай пасля смерці Сігізмунда II Аўгуста (1572).

4 Якімаў Пачынак (сучасную назву ўстанавіць не ўдалося). — Пачынкам у рускіх да XIX ст., як правіла, называлася нядаўна ўзнікшае пасяленне, якое звычайна ўтрымлівала гэту назву толькі на працягу льготнага тэрміну.

5 Маецца на ўвазе старэйшы сын Івана Грознага царэвіч Іван.

6 Маецца на ўвазе Сігізмунд II Аўгуст.

7 Відаць, Кміта-Чарнабыльскі пытаецца ў свайго адрасата, якімі тытуламі трэба суправаджаць імя новаабранага караля Рэчы Паспалітай Генрыха Валуа.










Hosted by uCoz