Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 6. До Валерьяна Протасевича, бискупа Виленского (03.III.1574).

До Валерьяна Протасевича1, бискупа2 Виленского3

Велебный в Кристусе, а ясневельможный милостивый княже бискупе виленский, пане а пане и государю мой милостивый!

Дошло ме, найнижшого служебника вашей панскей вельможности, моего милостивого государя, ласковое, милостивое писание вашей панскей милости.

Вшелякие пильности моей в службах государских и в(ашей) м(и)л(ости), панов рад, моих милостивых панов, так теж ку тым же службам посиляючи мене милостивою наукою своею панскою, яко пан, государ и отец наш милостивый, и к тому укладаючи о вси недостатки мои до их мости панов рад, а особливе до его милости пана подскарбего4 причины свое панской, яком то достатечне з ласкавого а милостивого писания в(ашей) м(и)л(ости) ку собе вырозумел, за што всё до моее смерти, поким на свете найдлужей жив, просечи пана бога за щасливое панование вашей м(и)л(ости), пана государя моего, вечне повинен служить. А дай, пане боже, абым найнижшы слуга вашей милости, моего милостивого государя, таковую вдячность з службы моей ку Речи Посполитой, ач мало годные, абым от его к(о)р(олевской) м(и)л(ости) и их милости панов рад, брати в(ашей) п(анской) вельможности, у приймованю послуг моих дознал. Бо за правду, милостивый государю, тое ласкавое писание вашей ксенженцей милости, государя моего, праве, ми серце мое охлодило, а якобы ме на конь всадило, и тым охотнейшым до таковых служб государских и вашей панскей милости тая милостивая ласка в(ашей) м(илости) справила, которая над заслуги мое мне ест оказана, иж в(аша) м(илость), государ мой, так вдячным, достатечным, широким писанием в(ашей) п(анскей) м(илости), неповажаючи вчасности, ани працы своее панские, рачил унижоного слугу в(ашей) м(илости), ме обослать.

А гды еще за милостивою причиною в(ашей) м(илости), моего милостивого государя, прийду до заплаты заслужоного моего и до якогокольвек опатрения на том замку остром пограничном, тым больш, не только так пильне служить, але и горло дать за государя и в(аших) м(илостей) панов рад, панов моих милостивых, готов есьми. И што в(ашей) м(илости), мой милостивый пан, в том же листе своем панском рачил мне, слуге в(ашей) п(анскей) м(илости), доложить, ознаймуючи мне о щасливом приеханю до Польски к(о)р(олевской) м(илости), нашого милостивого пана5, а иж бым вже нигде индей отколь з Орши новин не высылал, только просто до государя и до их милости панов рад. А где бы што такового непрешпечного было, абы для пересторожения того панства и тое столицы, особливе и до вашей панскей милости давал знать.

Я, милостивый государю, чинечи таковому росказанию вашой кнезицкой милости, пана государя моего милостивого, досыть, чогом се тут под тым часом з земли непрятельское через шпеги мои выведати мог, о том дал есьми знати до Кракова их милости паном радом Великого княжества Литовского, о всем выписавши достаточне, которые вести пришли первей, и потом, которые пришли другие.

Не затрудняючи в(ашу) м(илость), моего милостивого государя, в сем листе моем широким писанием, з листу першого до панов рад высланого, списавши копею с подписом руки моей, и потом з другого листу и инших свежых новин до их мости высланого, также списавши копею с подписанием руки моей власное, — тые обедве при сем листе моем через служебника моего Томаша Крупку, запечатавши, посылам.

С которого писания моего в(ашей) п(анскей) м(илости) достатечне будеш рачил вырозуметь, яко ж вже и по высланю тех обеих листов от мене до их мости панов рад тые ж неотмененные новины з Смоленска через некоторые купчики до Орши пришли, иж, де, то неотменне ест, же люд немалый до Смоленска прибыл и опатрености великие в месте коло острогу чинит, и чесноки всих валов, и коло Днепра вже почали робить, и о князю великом московском тое ж поведают, же до Якимова Починка самого его сподеваютсе.

А некоторые люди наши з сел, з заграничения приходечи, поведают, же, де, слыхать, якобы в Якимовом Починку вже имел быть сам и з сыном меньшим6.

Яко ж я, служебник в(ашей) п(анскей) м(илости), о том в день и в ночи пильность чиню и чого найпевнейшого и найпильнейшого ведомостю моею досягнути могу, так их милости паном радам до Кракова, яко и до в(ашей) м(илости), пана моего милостивого, до Вильны7 ведати давати буду.

Только тое, милостивый государю, рачте милостиве обачить, где мене так убогого, недостаточного слуги государского и в(ашей) м(илости), на тое ставати может, абым убогую маетностию моею, при тых границах мешкаючи, тые вси панства закладати и опатровати убозством своим на таковые потребы мог и до тых далеких панств посылкою, што ме, слуги в(ашей) м(илости), коштует?

К тому шпегом дати, сам з слугами и з статком своим живитсе при той украине, чим тое все опатровати?

А так яко около того, так теж и около таковое непреспечности, збираню и о готовности неприятельской, чогом для шерокости писания и затрудненя в(ашу) м(илость), государя моего, в том листе моем не доложил. О всем достатечне злецил есьми тому служебнику моему словне пред вашею милостыю преповедеть и преложить, ведаючи, иж в(аша) м(илость), пан мой милостивый яко пан мудрый, который всих речей и всих справ прошлых и пришлых з дару духа святого достатечней и лепей ведом быти рачиш, лацно зо всего будеш рачыл зрозуметь. А зрозумевши, жычливей государю его милости, к Речи Посполитой будеш рачил яко пан и найвыжший рада радить, якобы за неспанем которым, хотя ж от слабого неприятеля преспечность тых панств те заховать и опатренней и лепей тые украины осмотреть.

С тым жычечи в(ашей) м(илости), моему милостивому пану, в ласце божой при добром здровью фортунного панованя.

Писан у в Орши, месяца марца 3 дня, року 1574.


1 Валяр'ян Шушкоўскі-Пратасевіч (1504—1579) — князь, сенатар, епіскап віленскі з 1556 г., актыўны дзяржаўна-палітычны і царкоўны дзеяч. Узначальваў каталіцкую рэакцыю, заклікаў у Вільню езуітаў (1569), звяртаўся да караля Стэфана Баторыя з заклікам забараніць у сталіцы княства пабудову пратэстанцкіх (кальвінісцкіх) сабораў і школ. На Люблінскім сейме 1569 г. быў абраны ў каралеўскую камісію па выпраўленню другой рэдакцыі Статута Літоўскага (1566).

2 Біскуп (польск.) — асоба, якая кіруе каталіцкім духавенствам пэўнай царкоўна-адміністрацыйнай акругі, так званай епархіі.

3 У выданні Археаграфічнай каміссіі тэкст гэтага Ліста не друкаваўся.

4 Падскарбій — казначэй, чалавек, якому даручалася апека над дзяржаўнай і каралеўскай казной. Пасада гэта ў Вял. кн. Літоўскім існавала з канца XV ст. Да 1588 г. падскарбій быў толькі "дворным", г. зн. каралеўскім, і ў яго абавязак уваходзіла выдаткаванне сродкаў на дзяржаўныя патрэбы і на ўтрыманне каралеўскага двара. Да 1569 г. падскарбій дворны з'яўляўся членам каралеўскай рады. З 1588 г. у сувязі з утварэннем земскай казны і аддзяленнем яе ад каралеўскай у якасці самастойнага ведамства Вял. кн. Літоўскага абавязкі падскарбія дворнага звузіліся. З гэтага часу ён стаў толькі намеснікам падскарбія земскага, г. зн. вялікага.

5 У дадзеным выпадку размова ідзе пра прыезд у Кракаў караля Гепрыха Валуа.

6 Маецца на ўвазе царэвіч Фёдар Іванавіч.

7 Вільна (Вільнюс) — старажытны літоўскі горад. Першае летапіснае ўпамінанне аб ім адносіцца да 1320 г., калі Гедымін зрабіў яго сталіцай княства і пабудаваў тут свой замак.







Hosted by uCoz