Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 8. До панов рад Великого княжества Литовского (17.III.1574).

До панов рад Великого княжества Литовского1

Освецоные а ясневельможные милостивые панове рада Великого княжества Литовского, панове, панове мои милостивые!

Новины, годные ведомости в(ашей) п(анов) в(ельможности), моих милостивых панов, которых тых часов, марца третегонадцать дня, в суботу, отсюль з Орши, взялшы достаточную справу од Алексея, слуги мещанина виленского Лукаша Мамонича, через того ж Алексея, не могучи способен быть власному посланьцу моему на истраву чого дати, до его милости князя бискупа виленского2 до Вильна есми выслал, с пильностию е(го) п(анской) м(илости) просечи о то, абы тот лист мой в так вельце важных справ и новинах, иж бы его милость там, оттоль скарбным3 (паном. — А.К.) государским росказалши, дал на истраву, або своим коштем до Кракова до в(аших) п(анских) в(ельможностей) без мешканя переслати рачил. Который лист мой мам за то, же е(го) м(илость) з ласки своей тоже ку в(ашим) м(илостям) послал и тое писание мое у ведомость в(аших) м(илостей), панов моих милостивых, дойдет.

То пак, по высланю тых таковых новин, шпеги мои, которых уставичне мам при границах ку Смоленску, так и мещане з розных мест того панства государского, которые з Смоленска с куплями своими зворочают, одностайне справу дают, иж князь великий, ведаючи вже о прыйстю е(го) к(о)р(олевской) м(илости), нашаго милостиваго государя4, во всех своих справах и непреспечностях пильно ся опатрует.

Не отменяючи тых повестей ни в чом, только яком в первей через хлопца моего Лосятынского, так потем еще лепей и достаточней через тот мой лист, до е(го) м(илости) князя бискупа высланый, вашым панским милостям выписал и ознаймил.

То пак сегодня, в середу середопостную5, марца семогонадцать, пришли до мне шпеги мои, также заразом, на той же године, приехали подданые государские з Смоленска, мещане оршанские, и привели з собою полонника, который взят (в полон. — А.К.) в службе жолнерскей в Инфлянтех на имя Олексея Станиславовича, родем з Ошмены6,— и был продан од Москвы до Перми7, оттоль вышолши, шол на Москву аж до Смоленска, и поведает тыми ж словы, иж князь великий з обоема сынми своими у в Олександрове Слободе збирает войска великие против татар перекопских, (а. — А.К.) з нагайцы и черемисою покой вечный взял. И на тых днях до Смоленска жыльцов своих прислал, росказуючи тым людем, которые были притягнули для зологи и опатрения Смоленска, росказал им всим до себе зась тягнути, и всим детем (боярским. — А.К.), стрельцом и волощаном смоленским, росказал тепер заразом на берег ити.

Которые, де, вси войска московские, зо всих его земель собраные, тые вси мают быть обернены против татар перекопских, и черемиские, тые, де, о семой суботе мают быть на границах до Смоленска и до Полоцка и до инших городов.

Яко ж тые мещане оршанские, з Смоленьска до Орши едучи, поткались, де, з возом князя великого сих руских украин, з Тишком Ломакиным Смольня, от Смоленьска в двух милях. Тот Ломакин,— который здавна от мене шпегом ест и перед тым многие непреспечные ведомости и перестережение мне чинивал, что вже первей доходило ведомости государя его милости зешлого8 и в(аших) м(илостей) панов рад,— всказал до мене умыслне, праве, во вси тые слова, згожаючися яко с тым Алексеем, слугою Момоничовым, так з иншими шпегами моими, и с тым полонеником, и с тыми мещаны о вси тые справы князя великого. И поведил, иж то иначей не ест а не будет, только войском великим нагайским и черемиским до Смоленьска и по всей той украине быть. "Только, де, ведати того не можем, если з вас се первей што почнет або з нас. А теперь, де, воевода смоленский9 по мене послал, не ведаю, по што. Але так ми се, де, видет, што мне быти у князя великого. И вы, де, о том всем Филону от мене подружите. А нам бы, де, лепей, што б межи государи был покой". И всказалши тые слова, с тыми мещаны розъехалсе.

В(аши) м(илости), панове мои милостивые, о всем том рачите ведать. А иж о том до е(го) к(о)р(олевской) м(илости)10 особливых листов моих не выписую, то для причин тых, яком первей завжды о то писал, же власного тытулу е(го) к(о)р(олевской) м(илости) новоприданого не вемы, и прошу покорне, абы в(аши) п(анские) м(илости) мне о том, служебнику в(аших) п(анских) м(илостей), через писание в(аших) м(илостей) ведати дати рачили, естли тые вси новины у ведомость е(го) к(о)р(олевской) м(илости) от мене, слуги е(го) м(илости) государского и в(аших) м(илостей) панов рад, через оповедание в(аших) п(анских) м(илостей) доходят.

А то для того, естли бы на потом от е(го) к(о)р(олевской) м(илости) писание мене около даваня новин дошло, абых я, ведаючи, до короля е(го) м(илости) тых вже новин не повторял.

К тому теж ведати даю в(ашим) м(илостям), паном моим милостивым, иж воевода смоленский писал до подстаросьцего11 моего оршанского и вже се и не раз о то упоминает, иж посланник князя великого, в скором деле до в(аших) м(илостей) панов рад Коруны польское и Великого княжества Литовского от него посланы, у Смоленску ест задержан. Коло чого ку справе достаточной лист того воеводы власны до в(аших) п(анских) м(илостей) посылам.

А з яким подивенем пишут и з яким присмаком? А я сам и подстаростий мой, еще и до того часу науки не маючи, не вемы, што на то одписывать. Только то до того часу наука в(аших) п(анских) м(илостей) еще не дошла, на что все так на першее писание мое, яко и на тое, вельце с покорою моею прошу, абы неомешканую науку мел; яко о ласковую милостивую отправу того посланца моего Лосятынского, так о заслужоное мое, яко я тут, при том замку е(го) к(о)р(олевской) м(илости) будучи, чим тые вси потребы маю опатровать и чим се маю живити и посланьцов таковых з листы отправовати. Бо и теперь того посланца моего не мог бых чим выслать, але иж шафар е(го) м(илости) пана подскарбего12, пан Ян Головня, на страву даровал.

С тым жычечы в(ашим) п(анским) м(илостям), моим милостивым паном, в ласце божой при добром здровю фортунного панованя.

Писан у в Орши, месяца марца, 17 дня, року 1574.


1 У выданні Археаграфічнай каміссіі гэты Ліст пададзены пад № 6.

2 Маецца на ўвазе Валяр'ян Пратасевіч.

3 Паны скарбныя — г. зн. памочнік падскарбія, скарбны пісар і іншыя службовыя асобы дзяржаўнай казны. Будучы другой асобай ва ўрадзе земскай казны, пан падскарбны прымаў і запісваў у казначэйскія кнігі прыходы і расходы. Праз яго рукі праходзілі земскія паступленні ў дзяржаўную казну і выдаваліся грошы на расходы. У абавязак жа скарбных пісараў уваходзіла прымаць і выслухоўваць "лічбы" (г. зн. справаздачы) ад асоб, якія прадстаўлялі ў дзяржаўную казну грашовыя паступленні з месц, і рабіць рэвізіі на месцах збораў у земствах.

4 Маецца на ўвазе Генрых Валуа.

5 "...в середу середопостную" — г. зн. у чацвёртую сераду велікоднага посту.

6 Ашмяны — беларускі горад на р.Ашмянцы (левы прыток Віліі, басейн Нёмана). Вядомы з 1384 г., калі жыхары гэтага горада паспяхова адбілі нападзенне рыцараў Тэўтонскага ордэна. У 1569 г. стаў цэнтрам староства ў Віленскім ваяводстве.

7 Пермія — у тыя часы вялікая тэрыторыя, што ляжала на Захад ад Уральскіх гор і ўключала тэрыторыю сучасных Пермскай, значную частку Свярдлоўскай, Валагодскай абласцей, Комі АССР, частку Кіраўскай вобл. і Марыйскай АССР. У старажытныя часы ўся гэта прастора, заселеная рознымі плямёнамі, называлася Біярміяй, якая ў рускіх летапісах, дагаворах і пісцовых кнігах XVI ст. выступае пад назвамі "Пермь", "Пермія", "Пермь Вялікая". У 1472 г. была падпарадкавана Маскве. Сталіцай Біярміі быў г. Чардынь на р. Колве.

8 Маецца на ўвазе кароль Сігізмунд II Аўгуст.

9 Прозвішча смаленскага ваяводы ў 1574 г. устанавіць не ўдалося.

10 Маецца на ўвазе кароль Генрых Валуа.

11 Падстараста — намеснік старасты.

12 Маецца на ўвазе Лаўрын Мацвеевіч Война (?—1580), які спачатку быў каралеўскім дваранінам і пісарам яго вялікасці караля (1563), потым стаў дзяржаўным пісарам Вял. кн. Літоўскага (з 15.ХІІ.1566) і адначасова з гэтым падскарбіем павятовым (з 1569). Пасля смерці Мікалая Нарушэвіча атрымаў пасаду падскарбія земскага (з 30.VIII.1576).







Hosted by uCoz