Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 10. До панов рад Великого княжества Литовского (13.IV.1574).

До панов рад Великого княжества Литовского1

Освецоные а ясневельможные, милостивые панове рада Великого княжества Литовского, панове а панове мои милостивые!

Тых часов, месяца апреля 11 дня, на самый Великдень2, в обед здесе до Орши приехал посланец от воеводы смоленского, дворанин князя великого на име Иван Зверов, который дал мне листы зашытые за печатми самого князя великого.

Один лист писаный до е(го) м(ости) панов рад Коруны польское, а другий лист писаный до в(аших) п(анских) в(ельможностей), панов рад В(еликого) княжества Литовского. Которые листы в целости, яко мне ест даны, до в(аших) п(анских) м(илостей) посылам и за то покорне прошу, абых от в(аших) м(илостей), панов моих милостивых, о то писание до себе мел, естли тые листы врыхле до в(аших) п(анских) м(илостей) дойдут. Бо тот посланец воеводы смоленьского коло того пильное всказание до мене мел и просьбу чинил, иж бых тых листов не омешкал (послать. — А.К.), днем и ночью до в(аших) п(анских) м(илостей) поспешить.

Только то и сами в(аши) п(анские) в(ельможности) ведать рачыте, иж мне, слузе в(аших) м(илостей) пограничному, о посылки таковые трудно для того, иж на страву давать не маю чого. И яко велекроть о то до в(аших) п(анских) м(илостей) пишу, оповедаючи и чолом биючы, и просечы, абых поратоване на то которое з скарбу е(го) к(о)р(олевской) м(илости) мел.

В(аши) м(илости), панове мои милостивые, не только мене, слуги в(аших) м(илостей), в недостатку моим ратовать в том, але и отпису жадного до мене, служебника в(аших) п(анских) м(илостей), чинить не рачыте.

А прото ж нехай то будет при воли государскей и в(аших) м(илостей), нехай се моим недостатком — чого, боже, не дай! — Речи Посполитой потреба не затрудни, а мене, слуги в(аших) м(илостей), вже больш ку знищеню не приводи.

Я вже, слуга в(аших) м(илостей), мам за свое. Нехай же тое Оршы иншы хто з товарыства моего, слуг в(аших) м(илостей), скоштуе. И тепер на тое выслане, абы не была ласка служебника е(го) м(илости) пана подскарбего3, пана Головни, и тых листов до в(аших) п(анских) м(илостей) не мел бых чым выслать. Аж пан Головня, видечи так пильную потребу, тому посланцу на страву дал, а я не маю за што и хлеба купить; з голоду з слугами и з шкапами здыхам.

А о князю великом тот посланец, дворанин его, дает справу, иж, де, ест на тот час на Москве. А его, де, с тыми листы, едучы ему на службу з Смоленска против татар на Оку реку, посланец князь великого в дорозе поткал и з дороги е(го) здесе до Оршы звернул.

Яко ж сего ж дня, на Великдень, рано перед обедом, слуга каштелин (г. зн. кашталянаў. — А.К.) з другим товарыщом своим, влохом4 Антонием, которые просто з Александровы Слободы од князя великого с товары своими выехали, были (у мене.— А. К.) и дали ми тую справу, иж, де, ест (князь великий.— А.К.) у великой непреспечности от татар, и весь люд свой зе всих украин и зе всих городов обернул против татар на берег. А сам, де, Великдень мел прыймовать на Москве.

А к тому и от иншых шпегов своих вем, иж вси скарбы свои з Александровы Слободы до Новгорода Великого выпровадил и там, де, се и з сынми своими оборочает, бо, де, индей нигде местца преспечного от неприятель не мает.

А король, де, шведцкий5 вельми ему доробил, и теперь, де, войска шведзкие в земли его ест, и ратунку, де, жадного не мает чым учинить.

В(аши) м(илости), панове мои милостивые, рачте о том ведать. А штом в листе моем до в(аших) п(анских) м(илостей) писал и завжды пишу о нендзы моей оршанской, прошу покорне, абы то в(аших) м(илостей) панов моих милостивых, не ображало, бо голодному смерть на уме, и в таком опатреньи лепшей ми ест умреть, нижли жыву быть. А то ж вже, кому хотечи, оставляйте Оршу, а я уже до государа е(го) м(илости) еду. Большей силы моей стать не може, бо юж в обетницах старость зашла, а потом смерть найдет, а сором пропал.

А естли каждый о собе мыслить, и я пак, милостивые панове, чы бестыя, абы о жывоте моим промышлять не мел? Будет добро — будет. А не будет — горш сего не будет. А ничого! Межи людей, а не на стороне згину.

Инного на тот час не маючы чого писать, себе и покорные службы мои милостивой ласце в(ашим) п(анским) м(илостям) пильне поручам.

Писан в Орши, апреля 13 дня, року 1574.


1 У выданні Археаграфічнай камісіі гэты Ліст пададзены пад № 8.

2 Вялікдзень (рус. Пасха) — вялікае вясенняе царкоўна-рэлігійнае свята ў хрысціян, якое не мае ў святцах сваёй пастаяннай даты. Але, як правіла, прыўрочваецца да трэцяй квадры луны пасля паўналуння, якое наступае пасля вясенняга раўнадзенства. Вялікаднем завяршаецца сямітыднёвы вясенні пост у веруючых хрысціян.

3 Маецца на ўвазе падскарбій Вял. кн. Літоўскага Лаўрын Война.

4 Влох — жыхар Валахіі гістарычнай тэрыторыі Румыніі, што ляжыць паміж Дунаем і карпацкімі гарамі.

5 Маецца на ўвазе Іаан III Ваза.







Hosted by uCoz