Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 17. До панов рад Великого княжества Литовского (без даты; прыблізна ліпень 1574).

До панов рад Великого княжества Литовского1

Освецоные а ясневельможные милостивые панове рада Великого княжества Литовского, панове а панове мои милостивые!

Яком первей сего неоднокрот до е(го) к(оролевской) м(илости) писал и до в(аших) п(анских) м(илостей), панов своих милостивых, посылал и писал, и сам отсюль, по колькукрот зъежджаючы, оповедал и учыл и мовил, даючи ведать, иж тот замок государский оршанский жадного опатреня на собе не мает яко у забудованю стен, так и в недостатку стрельбы, пороху и пушкаров, так ку обороне ниц люду служебного, в недостатку жывностий. Хлеба, соли, круп, мяса — того всего згола ничего нет. Сам город увесь згнил так, иж жадным обычаем з обланок и з стен оборона жадная быть не может. На што сведецтва инного над особы в(аших) п(анских) м(илостей), которых то очы в(ашей) м(илости) самых, яко в(аша) м(илость), милостивы пане воевода виленский2, и милостивый пане виленский3, и инных веле панов рад, брати вашей панскей, способ тое Оршы видели, больше не потреба.

А иж, милостивые панове, и под часом выйстя того перемирия з неприятелем государским, жадного ратунку тому замку государскому и сам собе я, слуга в(ашей) м(илости), не вижу, а теж и ни которого слушного, дочасного або вечного через паны послы або гонцы с тым неприятелем постановеня не видим.

А неприятель, бачечы час свой, яком и первей сего, милостивый пане воевода виленский; до в(ашей) п(анской) м(илости) в недавном часе дал ведать, иж князь великий московский войска свои, которые мел против татар, тегнул до Можайска4. И тепер через шпеги мои не иншые, але тые ж вести овде нас доходят, же запевне сам и з обема сынми своими, былшы у Можайску и постановилшы там у справе войска свои вси, ехал до Старицы5, зводячы и збераючы люд большы, пускаючы славу, якобы мел силу свою обернуть против короля шведцкого. А умыслу, де, его жаден ведати не может, где и на которую сторону с тым обернет.

Што, если — чого, боже, не дай! — обернет ли се тут на тые украины? И яко о неспособности того замку оршанского Смоленск добре сведом, на которые кгды если кгвалт таковый прийдет, а про таковую неопатрность и неспособность в руки неприятельские — чого, боже, не дай! — тот замок з горлы нашыми пришол бы, для милосердия божого прошу и в час оповедам се, гды моцы не станет, абым я сам и потомство мое таковое неславы меть о мене абы не рачыло, иж не даванем справы, або марностию страты замок згинул, жебы то на домовстве моем, милостивые панове, не остало.

А поколь станет моей мочы, буду служить и чынить буду, што ми потцивому [так в публикации А.Ф.Коршунова – О.Л.] надлежить.

При том, милостивые панове, не мней и о то науку от в(аших) п(анских) в(ельможностей) жодам, иж овде межи шляхтою бурды се великие себе мают, так теж и от врадников их м(илостей) панских некоторых втиск немалый повставает в наездех и гвалтех и инших многих кривдех, с чого и врад непреспечность великую поносил. И возных6 на спр(а)вы жадные для небезпечности здровия их высылать не можем, иж некоторым на горло похвалки чинят. А инных киями бьют, которых таковых побитых и обелжоных ест немало. А иж право устало, жаден се усправедливити не хочет. И возные се того повету передо мною оповедали, иж юж справ земских больш того на собе носити не хочат, и врад свой для таковое срогости здают.

В(аши) м(илости), панове мои милостивые, о всем том ведать рачте; а яко о замок, так и опатрение мене, слуги в(аших) м(илостей), — о всем том науку свою панскую дать. Для чого всего, зъехалшысе овде до замку государского, намовы чынечы о всех тых непреспечностях, некоторые панове обователе краю со мною восполок просили есмо пана Федора Воропая, поборцы тутошнего, яко от мене, слуги в(аших) м(илостей), писане тое донесть, так и о все долеглости и непреспечности нашы пред в(ашими) п(анскими) в(ельможностями), п(анами) нашыми милостивыми, словне преложыть прозьбы и чолом бить.

Писан на Оршы, месяца...


1 У выданні Археаграфічнай камісіі гэты Ліст не друкаваўся.

2 Маецца па ўвазе Мікалай Юр'евіч Радзівіл.

3 Маецца на ўвазе кашталян віленскі. У 1574 г. ім быў Ян Іеранімавіч Хадкевіч.

4 Мажайск — старажытны рускі горад. Першыя летапісныя звесткі аб ім адносяцца да 1231 г. У свой час быў цэнтрам павета ў Смаленскім княстве. У 1541 г. Іван Грозны пабудаваў тут крэпасць для абароны ад Вял. кн. Літоўскага.

5 Старыца — старажытны рускі горад на Волзе (цяпер Калінінскай вобл.), заснаваны ў 1297 г. кн. Міхаілам Яраславічам Цвярскім. Быў аплотам баярска-княжаскай рэакцыі, накіраванай супраць рэформ Грознага. У XVI ст. цэнтр аднаго з апошніх удзельных княстваў на Русі. За гісторыю свайго існавання Старыца неаднаразова разбуралася ў выніку княжаскіх міжусобіц і набегаў літоўскіх князёў. У час вайны з каралём Стэфанам Баторыем Іван Грозны часта бываў тут з 1579 па 1581 г.

6 Возны (польск.) — афіцыйны судовы чыноўнік у Рэчы Паспалітай, у абавязак якога ўваходзіла ўручэнне павестак на суд і аб'яўленне судовых дэкрэтаў.







Hosted by uCoz