Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 22. До панов рад Великого княжества Литовского (28 (29) жніўня 1574).

До панов рад Великого княжества Литовского1

Освецоные а ясневельможные милостивые панове рада Великого княжества Литовского, панове, панове мои милостивые!

Даю ведать в(ашим) п(анским) м(илостям), паном своим милостивым: дня вчорашнего, в суботу, августа 28, позно, воевода смоленский прислал (посланцов. — А.К.) и писал до мене лист свой, даючы ведати, иж государ его, великий князь московский, в том прийстю посланцов е(го) к(оролевской) м(илости) до него, прыказал, абы он противку панству е(го) к(оролевской) м(илости) покой заховал до того часу, поколь государя нашого, е(го) к(оролевской) м(илости), послы великие у князя великого будут и певное постановене учинять. Яко ж я ку достаточнейшему вырозуменю в(аших) п(анских) м(илостей) лист воеводы смоленского власны и што есьми ему на то отписал, з листу моего копею пры том листе моем посылаю2.

В(аши) м(илости), панове мои милостивые, о всем том достаточне ведать будете рачыли.

К тому тые посланцы воеводы смоленского и тую ми справу дали, иж, де, князь великий посланцов государя нашого прыймовал в Старыцы. Было, де, то слышеть, иж их попровадити хотели до Александровы Слободы. То, де, тому тая была прычына, иж, де, сам под тым часом государ наготовался был ехать з Старыцы до Москвы. А листом, де, што о посланьцах писовали через все лето, не верил, и так се их в бордзе до себе не надеялсе. А вже, де, коли у Вязьме посланники ваши были, государ, де, розмыслилсе и захотел, де, вборзе их прыняти и бордзо отпустити; и отпустилшы, скоро, де, едет сам государ до Москвы и до Александровы Слободы. И надеемся, де, от сее недели за тыдень посланники государя вашого будут у Смоленску. И так, де, слыхать, же и своего посланника государ наш пры посланцах государя вашого короля до вас шлет.

В(аши) м(илости), панове мои милостивые, о всем том ведать рачте! А скоро се еще што певного о отправе их м(илостей) панов посланьцов поновить, в(ашим) м(илостям), своим милостивым паном дам знать.

Писан у в Оршы, августа 28, року 1574.


1 У выданні Археаграфічнай камісіі гэты Ліст пададзен пад № 17 і датуецца 29 жніўня.

2 Ні тэкст ліста смаленскага ваяводы, пра які тут ідзе размова, ні адказ на яго Кміты-Чарнабыльскага нідзе і нікім не друкаваліся. Па сведчанню Археаграфічнай камісіі ў тым рукапісу, па якім яна давала сваю публікацыю перапіскі Кміты-Чарнабыльскага, іх не аказалася.


Hosted by uCoz