Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 23. До панов рад Великого княжества Литовского (10 верасня 1574).

До панов рад Великого княжества Литовского1

Освецоные а ясневельможные милостивые панове рада Великого княжества Литовского, панове, панове панове мои милостивые!

Даю ведать в(ашим) п(анским) в(ельможностям): по высланю посланца моего ку в(ашим) м(илостям), моим милостивым паном, з листом воеводы смоленского, через который дал ми знать, иж государ его, великий князь московский, за прыходом посланцов е(го) к(оролевской) м(илости) пана Завацкого и пана Матфея покой при границах на обедве стороны заховал, аж поколь их м(илости) послы великие государя нашого до него сходят и о мирном пожытю межы панствы постановене учынят.

И было слыхать, же посланцов государских князь великий, ласкаве и вдячне принялшы, отпустил. О бордзе се их до Смоленьска сподевали. То пак потом по святе тепер прошлом — В небо взятие панны Марии2 — промчаласе ведомость таковая с Смоленска: здесе в границах панства государского по замках государских и панских якобы сталасе некоторая непреспечность е(го) к(оролевской) м(илости), государя нашого милостивого, посланцом, же суть задержаны и розведены.

Я, не скваплючысе с таковыми новины до в(аших) п(анских) м(илостей), трваючы в той тревозе через цалы тыдень, услухиваючысе, естли бы то иначей отменило, а иж се повести людцкие так розшырыли и не в беспечность нас всих в том краю привели.

Я, хотячы того згола до ушью в(аших) п(анских) м(илостей) прынесть, писалэм до воеводы смоленского, чынечы выведывание о бордзой отправе тых посланцов е(го) к(оролевской) м(илости) от его государя, задавшы прычыну: иж их м(илости) панове послы великие государя нашого поготову ... росказал тому посланцу моему пильное старане в выведыванию чынити: што бы за слух был, а што такового небеспечного было бы около посланцов государя нашого, и естли разведены и задержаны, што тому за прычына и которым есьми обычаем? ...о том до воеводы смоленского лист мой писал, и што теж мне воевода смоленски на то через тые посланцы мои отписал.

Я яко лист воеводы смоленского, так и тую терменацею мою пры сем листе моим до в(аших) п(анских) м(илостей) ку вырозуменю посылам.

А што се дотычет повести посланцов моих, чого се они там выведали, ино повести людзкие непреспечные в том краю, ведле повести их, ни в чом се не одменяют, а приставове их инакшое справы им не давали. Одно тыми ж словы о ласкавой отправе, яко первей было слыхать, же, де, посланники е(го) к(оролевской) м(илости), государя нашого, у государя их ласкаве и вдячне прыняты, чтены и дарованы. И отпустил, де, их, да только, де, у Вязьме змешкати мают десет дней, у Дорогобужью десет дней и в Смоленску, де, также штоськольвек дней змешкают.

Тыми, де, словы мал и велик — вси едностайне поведают, мовечы: "Так, де, нам всим велено поведать".

А о своем посланцу, который от государя их до е(го) к(оролевской) м(илости) пошол, пильне се прыпытывают и с подивенем то в себе мают, же я о отправе его и о звроценю борзом ведомости жадное через так долгий час не чыню. И так то ми се видит, слузе в(аших) м(илостей), моих милостивых панов, яко с повести посланцов моих, так и с писания самого воеводы смоленского посланцы его м(илости) государские не вем бы упредили до панства государского з земли неприятельское, поки се посланец их до них не звроти.

А к тому вельми то чуют люди так з строны московское, яко и овде по замках украинных, иж тот покой не вем бы надолго был, бо се штось бардзо отменило, и сами москва покою не тушы.

В(аши) м(илости), панове мои милостивые, ведаючы о всем том, рачте се на печы меть, а обварунок в час который от того неприятеля чынить так, якобы нас марне не подшел и неготовых не застал.

О том теж особливе рачте, в(аши) м(илости) панове, обмышливать, чым мне, слузе в(аших) м(илостей), так великоважные послуги и пересылки опатровать, которых прыходит час не только в тыдень, але и на день колько кроть выслать, хотечы справне, беспечне, а не заспале, в(аших) м(илостей), панов моих милостивых, во всем ведомых учынить? Также и шпеги, чым пренаймовать?

Тегнулэмсе, яко ремень, через два годы по смерти славное, светое памяти е(го) к(оролевской) м(илости)3, не маючы жадного опатрения и поратованя в моей нендзы, бо хотя ж тая Орша не ест столица, але только фортка панств государских, да только в таких службах нет ей ровни. И тых таковых тяжестей не поноси жадна украина, гды ж тутай неприятель вшелякими прычынами звыкл входить и выходить. А о опатрению замку южем досыть писал через осм лет. Поготову сами в(аши) м(илости) п(анские) ведать рачыте, який ест. Што все милостивому баченю в(аших) п(анских) м(илостей) поручылшы, с тым и т. д.

Писан у в Оршы, сентябра 10, року 1574.


1 У выданні Археаграфічнай камісіі гэты Ліст не друкаваўся.

2 "В небо взятие панны Марии" — каталіцкая назва рэлігійнага свята, вядомага ў праваслаўнай царкве як "успение преподобной богородицы", якое адзначаецца хрысціянскай царквой 15 (28) жніўня.

3 Маецца на ўвазе Сігізмунд II Аўгуст.




Hosted by uCoz