Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 27. До панов рад Великого княжества Литовского (верасень 1574).

До панов рад Великого княжества Литовского1

Освецоные а ясневельможные милостивые панове рада В(еликого) к(няжества) Лит(овского), панове, панове мои милостивые!

Даю ведать в(ашим) п(анским) в(ельможностям), п(аном) своим милостивым, иж п(анове) посланцы его к(о)р(олевской) м(илости) гоньчыка князя великого, который до посланника государя своего Федора Елизарева Елчанинова от князя великого идет, здесе до Оршы припровадили. О котором и воевода смоленский писал до мене, даючы ведать, иж того гоньчыка при панох посланцах его к(о)р(олевской) м(илости) государ его послал. То пак их м(илости), прыпровадилшы его з собою и не хотечы его большы пры собе меть и до в(аших) п(анских) м(илостей), до п(анов) рад, прыпровадить, з рук своих мне подали, розказалшы, абым я его за приставом моим и за пенези короля е(го) м(илости) до в(аших) м(илостей) або там на тое местцо, где ему ест потреба, провадил.

Я иж на то з скарбу е(го) к(о)р(олевской) м(илости) пенезей не мам ани от в(аших) м(илостей), п(анов) рад м(илостей), м(оих) м(илостивых) п(анов), на таковые посланники ни которого опатрения, через три дни им се того взбранял.

И так тот гоньчык был опущон, же было ему ни там ани сям, только иж за сторожою моею был. И кормил есьми его хлебом своим, постерегаючы того, абы тым неславы его кор(олевской) м(илости) и в(ашим) в(ельможностям), паном радам, не было, же у себе на то ни одного гроша не мам, а не только на то, але и сам не мам выживитца чым. Примусилэм до того подданых государских — мещан оршанских, которые, не будучы на то повинни ничого, и над повинность свою учынити мусели, и з собою се власным грошом зложыли и дали ми коп пять. Которыми пенендзми, далшы прыстава, розказал есьми того гоньчыка до Меньска2 провадити и там его, у Меньску, застановить до науки в(аших) п(анских) м(илостей), по которую оттуль, з Меньска, до в(аших) м(илостей), моих милостивых панов, тому ж прыставу моему ехати есми велел.

С тым жычечы и т. д.

Писан у в Оршы, месяца сентябра, року 1574.


1 У выданні Археаграфічнай камісіі гэты Ліст не друкаваўся.

2 Менск — старая назва Мінска. Упершыню ўпамінаецца ў летапісу як абарончая крэпасць Полацкага княства. З 1104 г. ужо вядомы як цэнтр удзельнага княства. У першай чвэрці XIV ст. апынуўся ў складзе Вял. кн. Літоўскага, у сярэдзіне XVI ст. цэнтр Мінскага ваяводства.


Hosted by uCoz