Гісторыя Беларусі IX-XVIII стагоддзяў. Першакрыніцы.


Помнікі старажытнай беларускай пісьменнасці / Уклад., уступ. артыкулы, каментарыі - канд. філалагічных навук А.Ф. Коршунаў. Мн., 1975.

Лист 28. До Лаврына Войны, подскарбего литовского (20 верасня 1574).

До панов рад Великого княжества Литовского1

Ясневельможный милостивый пане подскарби, пане а пане мой милостивый!

Будеш в(аша) п(анская) в(ельможность) вырозуметь (рачил. — А.К.) с писания листу моего до всих вобец в(аших) м(илостей) панов рад коло того гоньчыка князя великого, который пры посланьцах его кор(олевской) м(илости) в тых часах з Москвы вышол, яко ест от панов посланцов зоставлен и отсюль отправлен. А уважившы такове прыпадки и недостатки, рачте з баченя своего панского постереч, чым то отсюль опатровать?

Для бога! Абы ку якому шкарадному коньцу не прышло, што юж на око видим, же за недостатки, а нендзою нашою вшелякие справы и пильные потребы омешкиваютсе. Сам пищать мушу, а неприятель зе вшех строн все то види. А в(ашим) м(илостям), паном нашым, менечысе быть панами, ураду своему и тому назвиску потреба чынить досыть. Бом то слышал от самых же панов посланьцов, же тот гоньчык от князя великого до посланника его идет в пильных справах, а Речы Посполитой нашей пожиточных. А змешкает ли посельства своего того, потом не вем, што будет!

Так и вси инные справы, которых Орша перестерегать ест повинна, лепшого опатрения в(аших) м(илостей), панов нашых, была бы годна. Але вже нехай так иде, яко воля в(ашей) м(илости), кгды ж на покой таковый не вем на што бысте се в(аша) м(илость) спадевать, которого только естли бы был, або звроцене е(го) кор(олевской) м(илости), пана нашого, не змоцни.

С тым и т. д.

Писан у в Оршы, месяца сентябра 20, року 1574.


1 У выданні Археаграфічнай камісіі гэты Ліст не друкаваўся.


Hosted by uCoz