Гісторыя Беларусі IX-XVIII стагоддзяў. Першакрыніцы.


Андрей Рымша. Стихотворения на гербы Остафея Воловича и Теодора Скумина

Оба стихотворения публикуются по изданию: Анталогія беларускай паэзіі. Т. 1. Мн., 1993. С. 52, 54.

На герб ясневельможного пана, пана Остафея Воловича, пана Виленского и прочих

Што две стрелы, што врубы, что лелеи значат,
то вси люди мудрые вельми горазд бачать.
Которых зацныи тот дом за герб уживает,
вер мне, иж там господу цнота свою мает.

Впервые опубликовано в издании: Генадия патриарха Константинопольского, по наречению Сколяриса, диалог, или Само друга розмова. Вильно, друкарня Мамоничей, 1585. Л. 2.

На гербы ясневелможного пана, пана Теодора Скумина, воеводы Новгородского, епикграмма

Не простым людем гербы з неба посылают,
Яковый Скуминове в своим дому мают.
Як звезда над луною хорошо ся блищить,
А светла месечного бынамне не нищыть,
Так обое светлятся, ровно окром хмары,
Як слава у Скуминов мает свои дары.
Бо ним далеи, тым яснеи в славу ся подносять,
Урадами зацными под небо выносять.
Мог бы вместо месеца сонцо там отдати
И все небо з знаменми до него придати.
Бо так тот дом Скуминов в Литве ясне слынеть
И будеть завжды слынуть, поки свет не минет.
Смотри ж, як реки текут, а все три згодливе,
Вер, иж было где смотреть, а непохлебливе,
Бо не по однои реце плавал из делами,
Служечы господару розумом, силами,
Не чужому, своему, и отчызне милой,
Трафляючи недруга по шыи отылой.
Тот герб здавна в его дом з матки назначоно,
Бо такие прыметы у нем обачоно,
Иж водные послуги мел отправовати,
Тым ся господарови и всим подобати.
К тому еще два гербы видиш быть на споде,
Тых достали предкове его, на свободе
Будучи, а цнотою оных доставали,
Веру з мужством отчызне своей заховали.
Вер ми, гербов не дають в дому седящому,
Але з татарми в полю часто гулящому,
Не з голою рукою, з шаблею острою,
Завжды будучи готов до смертного бою.
Жыви ж з тыми гербами, ты, зацный Скумине,
А буяи в своеи славе навеки и ныне.

Впервые опубликовано в издании: Апостол. Вильно, 1591. Л. 2.







от производителя машинная вышивка по умеренным ценам

Hosted by uCoz