Гісторыя Беларусі IX-XVIII стагоддзяў. Першакрыніцы.


Симеон Полоцкий. Ранние стихи

По изд.: Симеон Полоцкий. Вирши. / Сост., подготовка текстов, вступ. статья и комментарии В.К.Былинина, Л.У.Звонаревой. Мн., 1990. С. 22-25.

Комментарий (стр. 386): "Как следует из заглавия… произведение представляет собой единый цикл стихотворных надписей к изображениям, очевидно, одноименной гравюры начала - первой половины 17 в. (...) Текст памятника находится в трех рукописях: раннем черновом автографе (ГИМ, Синод.собр., № 731), где он записан латиницей; беловом автографе (ГИМ, Синод.собр., № 288) и каллиграфической писарской копии, просмотренной и выправленной автором (БАН, 31.7.3). (Ср. также: ГИМ, Синод.собр., № 877, л. 56-58)".

ФРОН ИСТИННЫ, ЕЖЕ ЕСТЬ О БЛИЖАЙШЕМ СУДИИ БЕСЕДОВАНИЕ ИЗБРАННЕЙШИМИ НЕКИМИ ОБРАЗЫ СУДЕБНЫМИ НА МЕДИ ПРЕХИТРОСТНЕ И ПРЕИЗРЯДНЕ НАРЕЗАНЫМИ ИЗЪЯСНЕН

1

Пред Соломоном царем пря двею бывает
Жену о сыне диве; мудрый разсуждает,
Кая мати мертваго, кая же живаго,
Обе бо не могосте родити еднаго.
Велит полма пресещи, обема отдати
По части, но абие отрицает мати.
Ложной жива пущает, тако разсудися,
От любе царем мати той сын возвратися.

2

Обетшавшая в злобе старца умыслиста,
Да любы творит с ними Сусанна, с жен чиста.
Егдаже ю познаста непреклонну быти,
Целомудру начаша лжами поносити.
Ведься на смерть жена, но Бог свобождает,
Отрок Даниил мудре лесть их проявляет.
Тако лесть чистотою славно победися,
Двоица лживых старцев каменми побися.

3

Зрите горкия страсти, важдь Бога каснима,
Его же томят люде рукама своима.
Род жестокий, и люде, свойственнии Богу,
Ненавистми жестотми мучат попремногу.
Пилате, царя земна гнева ся боиши,
А Царя небеснаго зле на смерть судиши.
Но зане же гнев очий не утомим бяше
Инако, сице Христос волею страдаше.

4

Злый Каракалла, брата умертвив своего,
Дерза, Папиниане, помощи твоего
Гласа просити, но тя глас твой ублажает,
Ибо злу пособити мужу не дерзает.
О нем же понудися главу подклонити
Под острую секиру и умерщвлен быти.
Но мучителю злая слава последствует,
Тебе честь и похвала вечно присутствует.

5

Повеле царь Камвизес судию казнити,
Не праведна судивша, всего изкожити.
Бысть слово делом, кожа паки положися
На седалище судном, идеже грешися:
На ней сын изкаженна отца посадися,
Отчею правосудства смертию учися.
Но вящше греха казнен судия речеши:
Что жь творити, суд правый весма да почтеши.

6

Никто же да возмнит си безказненно быти,
Странным путем истинна неже велит жити.
Не сицев Гвилиелм есть, но правды хранитель,
Рекш: "Кровию грех мыяй, да будеш правитель".
Он земледелцу краву повеле отдати,
И абие преступше главу урезати.
О княже преголемый, над всеми богатый,
Имаши везде имя, яко венец златый.

7

Судии Цекрожедов ареопагити
В темныя время нощи избраша судити.
Тогда бо цветет хвала ума божественна,
Тогда лица не зрятся, и вся утишенна.
Того ради от еллин нощь именовася
Благая советница, и добре прощвася.
В ней бо совети, в ней страх умы исполняет,
Чювства паки день чиста и молва вреждает.

8

Истинны страж праведный и друголюбитель,
Виас бяше по суде верный злобе отметитель:
Елижды злободейцы на смерть осуждаше,
Лице свое слезами горце обливаше.
Не достоит, глаголя, с крови ся тешити,
Кто желает отчины отцем речен быти.
Паче слезами нужда болезнь проявляти,
Обаче винных казни правой предаяти.

9

Царь Александр наипаче вславися,
Яко брегл правды, выну в ней глумися,
Уст не отверзя, даже обем вняше
Странам, лица взор всячески отъяше.
Важдущу убо даяше едино
Ухо, вожденну соблюдаше ино.
Заткнув перстом си. Кто, не слушав, судит,
И правит, судя,— против правды блудит.

10

О вы, страж, им же правда есть врученна,
Законы даде правды божественна.
Недвижни будте ради благодати,
От правды и слез не знайте взирати.
Нет лепо молбам правду попирати,
Колми за злато истинну продати;
Страсть, дружбу, вражду забыть подобает,
Кто правосудство соблюсти желает.

11

Судии дело правилы вершится,
Пучину дела всяк им да судится.
Убо прилежно аще разсмотренно
Дело, да будет абие вершенно.
Несть же лет винна казни звободити,
Ко лжи же паче безвинна казнити.
Царю леть вяшчше, может бо простити,
Обаче не всё и живот дарствити.

12

Судии градов, им же правду знати,
Весма есть нужда и всем суд даяти,
Права судите, ибо пред Христово
Судище ставше, дасте о всем слово.
Его же время зане утаенно,
Молитвы дейте и бдите бодренно.
Да не пронзет вас труба и суд правый
В день он престрашный Христа, царя славы.

13

Солнце едино весь мир озаряет,
Бог превыспрь небо един обладает:
Тако во царстве един имать быти
Царь, вся ему же достоит правити.
Обаче в помощ трудов нестерпимых,
Да имать совет муж благочестивых.
Еже Моисию тестем совещанно,
Всяк царь да возмнит к себе глаголанно.







Hosted by uCoz