Гісторыя Беларусі IX-XVIII стагоддзяў. Першакрыніцы.


Загароўскі зборнік. "О крестѣ Господнем"

Знаменiе Твое крестъ животворящiй,
царемъ и народомъ яко солнце свѣтящiй,
Оружiе на враги и наша ограда,
имъ посрамляются невѣрныи чада.
Сердца вѣрныхъ людей увеселитъ значне,
коли его узрятъ на небеси зрачне.
Который объявитъ приходъ Тебе Христа,
иже нынѣ зъ мертвыхъ божественнѣ воста.
Въ день великаго и страшливаго суда,
на осужденiе грѣшнаго народа,
А на радость вѣрнымъ кiотъ скарбу своего,
яко царскую ложницу камень гроба Его
У церкви восточной зоставити рачилъ,
абы каждый вѣрный милость Его бачилъ.
У Iерусалимѣ, гдѣ смерти вкусилъ,
и гдѣ себе за насъ на жертву приносилъ.
Гдѣ Святого Духа апостоломъ послалъ,
и тайную вечерю съ ними отправовалъ.
Гдѣ Iосифъ руками своими обвивалъ,
пречистое тѣло у камень поховалъ.
Гдѣ печати и стражи жидовскiи были,
гдѣ мироносицы съ мазями приходили.
Гдѣ ангела и камень отваленъ узрели,
гдѣ голосъ ангельскiй о Христѣ слышали.
Гдѣ живого Христа жены оглядали,
гдѣ Петръ со Iоанномъ скоро притекали.
Гдѣ евангелiе вертепъ называетъ,
нововысѣченный камень вспоминаетъ.
Гдѣ стражiе обмерли и зъ страху утекли,
и скоро отъ гроба ко граду притекли.
Тое мѣсто самое въ горѣ недвижимо,
и до судного дня стоитъ нерушимо.
Тамъ ся огонь являетъ на пасху святую,
на воскресенiе въ недѣлю самую.
Коли «Христосъ воскресе» во церкви спѣваютъ,
Тамъ оныи дары вѣрныи прiймаютъ.
Даючи намъ знати, коли праздновати,
абы за блудными не послѣдовати,
Чему еретицы вѣры не даютъ
и купно съ жидами праздники мѣваютъ.
Гдѣ Елена церковь созидала,
гдѣ и крестъ Господенъ отъ земли зыскала.
Тамъ Патрiархъ святѣйшiй престолъ его маетъ
и во руцѣ свои огонь воспрiймаетъ,
На гробѣ господнемъ свѣчи запаляетъ
и всѣмъ христiаномъ вѣрнымъ подаваетъ.
Такую благодатъ Гробъ Господенъ маетъ
и христiанскую вѣру утверждаетъ.
Вы же, православнiи, вѣру заховайте,
и Бога истинно въ ней познавайте,
И чудеса Его всѣмъ проповѣдайте,
и лжехристiаномъ вѣры не давайте.
Нелюбящiи Сiона будутъ посрамлени,
якъ трава сухая огнемъ испалени.
Не чудѣтеся западнымъ, ижъ насъ отступаютъ,
и старожитную вѣру премѣняютъ.
Попущаетъ имъ Богъ жити самовластно,
иже поправуютъ вѣру многочастно,
Абы отъ запада новый законъ дати
и всѣхъ зъ восточного до него призвати.
Писанiе о нихъ явно повѣдаетъ,
Даниилъ божественный пророкъ извѣщаетъ.
Схотятъ, рече, часы и лѣта змѣнити,
иже на кончинѣ маются явити.
Що самому Богу оное возможно,
иже Его властью творить не преложно.
И письма, и службы, и свята змѣнили
и святыхъ апостолъ уставъ преступили.
Для зависти и пыхи сiи обрѣтаютъ,
и въ роскоши тѣла себе прилагаютъ.
Убогимъ бо Христомъ уже погордѣли,
богатаго отца папу прiобрѣли.
Видите, вѣрныи, многiя соблазны,
Будьте Богу вѣрны, щиры и прiязьны.
Съ Сiона есть дано намъ законъ духовный,
гдѣ ходилъ по земли пастырь нашъ верховный.
Изъ Iерусалима слово Его вышло,
и ко всѣмъ народомъ спасенiе пришло.
Нехайже римляне тому вонимаютъ,
и Богу самому съ нами работаютъ.
Нехай покаются свавольне ходити,
нехай перестануть неправдѣ учити.
Не йдемо за ними, съ востока на западъ,
зоветъ бо насъ Господь во святый его градъ.
Сiона любѣмо, Сiону служѣмо,
и Божей волѣ пильно стережѣмо.
Ненавидяще же зводителей новыхъ,
иже отлучаютъ отъ волей Христовыхъ.
Достоитъ намъ твердо вѣру сохранити,
да Богъ самъ поможе враги посрамити.
Самъ бо скоро прiйдетъ враги погубити,
и плачущимъ нынѣ потѣху явити.
Потерпите мало, Господа пождѣте,
и себя отъ муки вѣчныя спасетѣ.
Гробъ Господенъ вѣрою любезно цѣлуйте,
и во благочестiи себе приготуйте.
Съ Христомъ воскреснути, братiе, желайте,
и цѣлую любовь Ему заховайте.
Той бо любитъ Господь Сiоновы врата,
и заповѣдь его и вѣчна, и свята.
Сiоновы дѣти, духовно играйте,
и чистыми усты Бога прославляйте.
Ангельское пѣнiе Христови спѣваймо,
и Евангелiемъ сердца увеселяймо.
Цвѣты прекрасныи вѣры процвѣтаютъ
и радостъ вѣчную вамъ уготовляютъ.
Новый Iерусалимъ свѣтло украшено
и праведнымъ святымъ прiуготовано.

Загароўскі зборнік


Hosted by uCoz