Гісторыя Беларусі IX-XVIII стагоддзяў. Першакрыніцы.


Загароўскі зборнік. "Об отступных от церкви"

Врагови подобни церковніи врази
и его милыи и вѣрніи друзи,
Иже Востока свѣтлость нынѣ составляютъ
и до тмы Запада въ прелесть отбѣгаютъ,
Отъ истины до лжи, отъ вѣры во ересь,
отъ святыхъ сладости во грѣшную горесть.
Водимы бываютъ плотскими совѣты
и не сохранили ко Богу обѣты,
Которыхъ ко Нему сами учинили
и своими усты оныхъ осудили.
К богатому папѣ отбѣгли на пашу,
абы за пѣнязѣ погубити душу,
Гдѣ все им по волѣ будетъ поблажати,
измышленный христосъ, убійца, не мати,
Иже всю вселенную злостями осквернилъ
и духовный разумъ на плотскій измѣнилъ.
Духъ же святый истиненъ, солгати не можетъ,
и людемъ прегордымъ гордость не поможетъ.
Аще бо кто вержетъ камень на высоту,
мняще небесную збивати красоту
Всемірнаго солнца, яснаго свѣтила,
на такого падется и оная сила.
И на свою главу воспрійметъ болѣзни,
да к тому престанетъ творити соблазны.
И сіи же Христовы церкви не побѣдятъ,
але сами себе во вѣки безчестятъ.
И срамоту пріймутъ от онаго славы,
крѣпость Его и судъ сокрушитъ имъ главы.
Навернѣться, бѣгуны, ко церкви Восточной,
пріидите къ матери святой, непорочной,
Не шукайте Христа на Западѣ, в Римѣ,
и явился намъ Богъ нашъ во Іерусалимѣ.
Уже бо не прійдетъ съ земнаго вертепа,
але отъ Божія небесного свѣта.
Папа бо пануетъ не на небѣ, въ Римѣ,
и погребается во землѣ и ямѣ.
Не якъ Богъ владѣетъ, человѣкъ бо тлѣнный,
слава и вѣкъ его вскорѣ отмѣнный.
Але Царь небесный сидитъ на столицѣ,
и трепещутъ предъ Нимъ ангельстіи лицы.
И все созданіе Ему ся кланяетъ,
отъ Него животъ и духа мѣваетъ.
И самый Петръ въ Римѣ где бы нынѣ восталъ,
благочестія вже тамъ бы не засталъ.
Его намѣстники имъ бы изгордѣли,
Иже, як царове, по немъ збогатѣли.
Мусилъ бы ихъ снова нищеты учити,
але по истинѣ не могъ бы смирити.
Праведно жъ бы папамъ Петра памятати,
востанетъ бо потомъ онъ ихъ обличати.
Сохранѣмо жъ вездѣ Петровы науки
и будемъ Христу и ему ученики.

Загароўскі зборнік


Hosted by uCoz