Гісторыя Беларусі IX-XVIII стагоддзяў. Першакрыніцы.


Загароўскі зборнік. "Крещение без мира у Римлян"

Крещенія свои безъ мира справуютъ,
не якъ апостоли сіе отправуютъ.
И трехпогруженія въ костели не маютъ,
и новокрещенныхъ блатомъ помазуютъ.
Тремя погруженьми Тройцу вызнаваемъ,
и смерть гнюсную тайно возвѣщаемъ.
Ибо вода сія тѣло омываетъ
и святое миро члонки освящаетъ:
Слухъ и очи, и чело, перси, руцѣ и нозѣ,
яже просвѣтлены бываютъ о Бозѣ.
И даръ невидимо духовный пріемлемъ,
от Бога и Отца сыновство пріемлемъ.
Гдѣ святыи молитвы бываютъ читаны
И бѣсове тогда бѣгутъ, изгонимы.
Зъ святыхъ апостоловъ такъ есть намъ подано,
и отъ святыхъ отцевъ каноны ствержено.
Нынѣ вже римляне письмо преслушали
и набоженства ихъ ново позмышляли.
Вже бо жидовствуютъ съ своими органы,
любо плясальницы въ Бога поруганы.
Господь не требуетъ пищалей и шума,
иже тщеславніи воплютъ безъ ума.
О мірская! будто Богу догожаешь
и умиленіе зъ людей выганяешь.
Гудутъ бо трубами, якъ смоки рыкаютъ,
гдѣ Божіи ангели приступу не маютъ.

Загароўскі зборнік


Hosted by uCoz