Гісторыя Беларусі IX-XVIII стагоддзяў. Першакрыніцы.


Загароўскі зборнік. "Папѣжне непокорство Христу"

Доколѣ жъ, о папо, высишься на Христа,
будетъ бо отъ Него на грѣшники помста.
Достоинъ ти святый крестъ честію почитати,
предъ которымъ бѣси звыкли трепетати.
Крестъ намъ печать, вѣрнымъ христіаномъ,
а нападеніе невѣрнымъ поганомъ.
И святого Петра такъ не заповѣдано,
и тебѣ заклято и не благословенно.
Ни одинъ святитель нигдѣ на вселенной
не согласуетъ такъ твоей власти темной.
И креста на нозѣ свои не вкладаютъ,
котораго въ чести ангели мѣваютъ.
Безотвѣтенъ будешь предъ Царемъ распятымъ
и отъ святыхъ Его станешься проклятымъ.
Дасть тебѣ Бог нозѣ по землѣ ходити,
а ты узаконивъ людемъ цѣловати.
О гордая гордыне, кичишься до неба,
але во глубину снидеши до ада.
Надмѣніе твое якъ водная пѣна,
але твоя крѣпость яко паутина.
Явно всему свѣту, ижъ ся обожаешь,
иже есь персть и пепелъ, сего презираешь.
Не буди жъ намъ сіе, матку оставляти,
Восточную церковъ, и Богомъ кламати.
Слышите, слышите, всѣ вѣрныхъ народы,
яко изъ папѣжемъ шукаете згоды,
Который вамъ кажетъ себе обожати
и тлѣнніи нозѣ свои цѣловати.
Святый нашъ Владыка инымъ нозѣ вмывалъ,
апостоломъ Его, и такъ ихъ научалъ.
Читайте жъ о Петрѣ, естли папѣ отецъ,
который не набылъ многоцѣнныхъ столицъ.
Але терпѣніе в нищетѣ проходилъ
и от грѣха людей многих освободилъ,
На діавола брани многіи поставилъ
и кровію его Господа прославилъ.
Не вбивати, но умрети за люди возлюбилъ,
и своего Христа вседушно улюбивъ.
Животъ апостольскій легкій и высокій
и надъ земныхъ царей предъ Богомъ великій.
И римскіи папы тымъ ся тщеславуютъ,
але духовное житіе минаетъ
во многихъ богатствахъ и тѣлесныхъ сластехъ,
во славѣ и чести и по своихъ страстехъ.
Але всѣ знаете, ижъ пышныи гніютъ
и Святого Духа в собѣ не маютъ.
Въ покорныхъ пастырехъ Христосъ пребываетъ,
але горделивыхъ далеко минаетъ.
Гдѣ жъ нынѣ папѣжи за вѣру вмираютъ?
але за ихъ ересь многихъ убиваютъ...
Пожираютъ, яко львы, отческіи права,
абы славилася всего свѣта глава.
Христосъ — глава церкви, а блудницы — папа,
и своихъ заводитъ въ пекельніи врата.
Христосъ — глава вѣрныхъ, а ересемъ — папа,
иже пойдетъ съ ними въ пропастніи врата.
Человѣкоугоднымъ всѣмъ есть наставникъ,
а въ лицемѣріи Богови противникъ.
Не есть всѣмъ угодно его наслѣдити,
понеже не могутъ такъ обогатѣти.
Але нищимъ всѣмъ Христосъ есть учитель
и любящимъ Его правдивый Спаситель.
Таковыхъ пастырей и вы наслѣдуйте,
и себе въ чистотѣ Богу приготуйте.

Загароўскі зборнік


Hosted by uCoz