Гісторыя Беларусі IX-XVIII стагоддзяў. Першакрыніцы.


Загароўскі зборнік. "Гордость папѣзская"

О прегордый папо, откинь твои блуды,
иже посмражаешь всего мiра студы.
Гдѣ жъ ти Петръ повелѣвъ посты розоряти,
але подъ клятвою оныхъ заховати.
Почто жъ отъ блудницъ дани избираешь
и онымъ блудити явно позволяешь?
Для чего празнуешь свята изъ жидами,
христоубійцами, Божіими врагами?
Клятва апостоловъ тебе искараетъ
и святый ихъ канонъ тебе обличаетъ.
И Евангелія чому не читаешь,
до вызнаня вѣры ересь придаваешь?
Святого бо Духа Отецъ посылаетъ,
Который по Сыну предпочиваетъ.
Научилъ насъ Христосъ тако вѣровати
и благоговѣйно Тройцу почитати.
Але не знаемо, хто тебе научилъ,
абы и отъ Сына Духъ Святый походилъ.
До третего неба не былъ есть восхищенъ,
ани зъ апостоловъ того не наученъ,
Которымъ Сын Божій духа обѣтовалъ,
Которому прійти изъ Отца именовалъ.
Отецъ Сына родилъ и Духа изліялъ
и всему мірови познати даровалъ,
Во единомъ Божествѣ Тройцу вызнавати,
царство и владзу едну познавати.
Якій евангелистъ такъ тебе научилъ,
дабы и отъ Сына Духъ Святый походилъ?
О мудросте земная, Богу покорися,
и ты, честный отче, ереси заприся.
Два початки Духу Святому не учи
и Евангеліемъ самъ себе обличи.
Кривой науки остави учити
и святого Петра люби наслѣдити.
Хочешь отмѣняти Божее безумне,
но твоя срамота тебе не омине.
Богомъ ся на земли смѣешь удавати...
Ключарю до ада, Петра не потваряй
и собе до Христа врата не затворяй.
Не есть большій слуга надъ своего пана,
ани Божія власть тебѣ не подана.
Попуешь ли въ Римѣ, не служи сатанѣ,
поповати тебѣ достоитъ смиреннѣ.
Не мечъ и копіе Петръ ти зоставуе,
ани мужебойства чинити повчае.
Але Христовъ яремъ кажетъ ти учити,
а ты поучаешься братоубійствовати.
Якъ можешь учити людей свято жити,
если ся Богови не хочешь покорити?
Збираючи скарбы, учиши нищеты,
а не пріемлеши Христовы простоты,
Росказуешь себе на главахъ носити,
будутъ ся бѣсове о тобѣ хвалити.
Зъ ними бо згодливе поваги вживаешь
и смутити церковъ онымъ помогаешь.
Недолго ти тая ловитва послужитъ,
ани Петръ-апостолъ тебѣ не поблажитъ.
Егда на судъ Божій испуститъ земля,
искараетъ Господь беззаконныхъ племя.
Святыи намъ книги того не сказали,
ижъ бысьмо папѣжа главою звали,
Иже всю ересь хитро покрываетъ
и святого Петра дармо потваряетъ.
Не Евангеліе заховуетъ цѣло,
але разсѣкаетъ церковное тѣло.
Мѣваютъ и гробы златыи оздобу,
але внутри полны человѣчаго смраду.
Такимъ себе любитъ папа оказати,
абы его таинъ не могли познати.
Але вы, братіе, Христа величайте
и всею душею Того почитайте,
Который и душу, и тѣло даровалъ
и Царство Его вѣрнымъ обѣтовалъ.
Никто же не блуди отъ святаго пути
и достоинъ будешь одесную стати.
Путемъ Христовымъ отцове ходили
и намъ ити стезю благу сотворили.
На лѣво и десно да не возвратимся
и Христу-Господу вѣрно прилучимся.
Чужая то слава, и Бога минаетъ
Западная церковъ, иже отступаетъ
Свѣтлости Божей и Его дороги,
Который погубитъ вѣчно своя враги.
Але вы пріязни въ Бога набывайте
и съ еретиками згоды не мѣвайте.
Всѣ бо преступницы свои стези маютъ,
а пути Христова во вѣки не знаютъ.
Яко же бо дыма, нынѣшній вѣкъ любятъ
и душу, и тѣло для марности губятъ.
Мамонѣ, якъ Богу, вѣрно работаютъ,
во златѣ и сребрѣ надежду мѣваютъ.
Поколя плотію живемо во мірѣ,
утвердите себе во Христовой вѣрѣ,
Старцы и юноши, и всякій народе,
будите во вѣки во Христовой згодѣ.
Познайте ясно прелюбого Царя
и будете потомъ, якъ свѣтлая заря.
Нехай же васъ хитро міръ сей не полонитъ,
ани прелесть его до грѣха не зводитъ.
Иже утѣкаетъ, яко звѣрь изъ горы,
и якъ вода быстро минаетъ воскорѣ,
И скалы и пески валяетъ съ высока,
такъ грѣшного слава погибнетъ до вѣка.
Міра сего слава сладка есть и люба,
але якъ морская потопляетъ вода,
Которыи ея нынѣ пріобрѣли
и вѣчной жизни за сію презрѣли.
Достойна есть смѣху и Христа далече,
и души грѣшниковъ во муки привлече.
За честь дочастную мерзости во вѣки
праведно пріемлютъ злыи человѣки.
Сохрани васъ, Боже, храните жъ и сами,
вси бо есте Богомъ во вѣру призвани.
Слава бо и злато, якъ тѣнь, мимоходятъ
и любящихъ сія въ пагубу приводятъ.
Такую то цѣну душѣ учинили
и за небо землю собѣ улучили,
Отступники вѣры, отъ Христа бѣгуны,
абы уводили до церквей новины.
Смѣючи и Христа тымъ вже повторяти,
абы своихъ страстей волю исполняти.
И съ грѣхами хотятъ отъ муки спастися,
ты же, боголюбче, отъ нихъ отвратися.
Душе, душе злая, ереси отметай
и на погибели свои воспамятай.
Поверзи, поверзи служити сатанѣ,
будеши терпѣти въ мучимой глубинѣ,
И злато, и папа тамъ тебе забуде,
и горе, и плачи — съ тобою пребуде.
Не торгуй душею, второе не купишь,
и лживый пастырь къ тому да не будешь.
Пристояло тобѣ нищету терпѣти,
а не богатства у папы шукати.
Господь, нашъ Спаситель, нищету претерпѣлъ
и во страданіи увесь міръ освятилъ.
Кто жъ тя такъ научилъ новаго закона,
иже кромѣ Бога вынашелъ сатана?
Мудрость бо плотская Христа преслушаетъ
и Духа Святого въ собѣ не вмѣщаетъ,
Которая церкви смущенія творитъ
и врата до Христа грѣшникомъ затворитъ.

Загароўскі зборнік


Hosted by uCoz