Гісторыя Беларусі IX-XVIII стагоддзяў. Першакрыніцы.


Загароўскі зборнік. "Церковъ Западная блудит"

О римская церкве, чому погибаешь
и святое письмо смѣле отметаеш...
Плачемося о васъ, милыи римляне,
твердосердечніи жидо-христіане.
Чого Христосъ не любитъ, а вамъ тое любо,
але смиреніе Божіе не любо...
Плачутся святыи на ваше безстудство,
ижъ упадаете въ вѣчное проклятство.
Помраченіе ума людей славолюбныхъ
наноситъ съ западу уставъ душегубныхъ.
Але покажите вы, римскіе дѣти,
гдѣ вамъ позволяно заповѣдь презрѣти?..
Шумите словесы, Бога обидяще
и Евангелія его не храняще.
Але ваши власти Спаситель погубитъ,
иже беззаконнымъ помстити приходитъ.
Розкажетъ и папѣ нагому предстати
и поважность тую отъ него узяти.
Мусите забыти папу Христомъ знати,
который васъ учитъ себе обожати.
Але древо отъ плода бываетъ познано
и благочестіе дѣлами явленно.
Блаженный убо Петръ служній урядъ принялъ
и, яко ученикъ, смиреніе хранилъ.
Царства у Римѣ не помысливъ мѣти,
але всякую скорбь за Христа терпѣти.
И папамъ не казалъ мучительми быти,
ани православныхъ на ересь нудити.
Але таковы суть намѣстники злыи,
въ которыхъ мѣшкаютъ духи не святыи,
Которые кресты и мечи пріемлютъ
и похитительне власти воспріемлютъ.

Загароўскі зборнік


Hosted by uCoz