Гісторыя Беларусі IX-XVIII стагоддзяў. Першакрыніцы.


Загароўскі зборнік. "О простотѣ Апостола Петра"

Убогій Петр и нищій о Христѣ памяталъ
и волю плотскую отъ себе отметалъ.
Животъ его каждый познати хотите
и его стезями по Бозѣ ходите.
Была его слава оковы и темница,
не папѣтворная гордая столица.
Апостолъ бо Христовъ, истинный служитель
и всякихъ сокровищъ конечный неимѣтель.
Ризы бо худыи тѣло одѣяли
и обуви ногамъ его послужили.
Постель ему земля, а не одры чудны,
не отъ плачу нищихъ, иже Богу скудны.
Грѣховъ тежъ за злато никому не простилъ
и некающимся муки прозвѣстилъ.
Головою себе не помысливъ звати,
ани Господней чести похищати.
Але крестная смерть — то его похвала,
и такая по немъ столица зостала.
Убогіи рубы и нагое тѣло,
иже нужнѣйшой смерти вокусило,
Начальства жъ гордаго папамъ возбраняетъ
и его листами крѣпцѣ завѣщаетъ.
Начальникомъ вѣры зватися не хотѣлъ
и всю свою волю Христу поработилъ.
Иже міру всему себе укрыжовалъ,
иже Христа ради кровь свою изліялъ.
Добрый рабъ и вѣрный теченіе скончилъ
и душу Богови въ руцѣ поручилъ.
Теплѣйшій во вѣрѣ, правый исповѣдникъ,
камѣнь вѣры и святый міру проповѣдникъ.
Римъ его кровь пріялъ, завѣсивъ на древѣ,
а Христосъ отворилъ къ собѣ ему двери.
О чистьцу не писалъ и славы не училъ,
и многіи чада Богови прилучилъ.
Не важився кламства на свѣтъ выдавати
и въ чистецъ по смерти души посылати.
О Божемъ царствѣ и мукахъ повѣдалъ
и покаяніе прежде смерти подалъ,
Всѣмъ быти готовымъ предъ Христа приказалъ,
огнемъ поновленіе всей твари написалъ,
Иже во день судный будетъ очищати,
и явно и страшно свѣтъ будетъ палати.
Иже потопъ огненный то ся называетъ,
имъ же, яко злато, Богъ міръ очищаетъ.
Во огнѣ пламеннѣ, святый Петръ мовитъ,
всесильный и страшный Царь и Богъ приходитъ.
Але того чистцу, якъ Римъ повѣдаетъ,
святый Петръ и Павелъ не проповѣдаетъ
Але запрещаютъ вѣрнымъ не грѣшити,
а грѣшнымъ покуту на землѣ чинити.
Ознаймили всѣмъ отъ мертвыхъ востати
и душѣ и съ тѣломъ заплату пріймати.
А нынѣ папежи лѣта продаваютъ
и до чистьцу души грѣшныхъ посылаютъ.
Кто имъ больше злата за тое даруетъ,
такіи наданья отъ оныхъ пріймуютъ,
Ижъ ему всѣ злости заразъ разрѣшаютъ
и на колькосотъ лѣтъ въ чистецъ посылаютъ.
Мы же злого грѣха скоро отбѣгаймо
и такимъ прелестямъ вѣры не даваймо.
Караетъ Богъ грѣшниковъ дочасно и вѣчно,
и злодѣланіе діаволу прилично.
Царство вѣчное конца не мѣваетъ
и мука мучимымъ не преставаетъ.
Пифагоръ-философъ, поганьскій учитель,
чистцоваго огня первый изъявитель,
такъ разумѣвъ и писавъ, а римляне держатъ
и многихъ роспутно грѣшити приводятъ.
Для чего лакомства, и блуды, и убійства,
богопротивніи творятъ своволеньства?
Скажи жъ намъ, костеле, якъ о Христѣ вѣришь,
Который безъ грѣха, яко и самъ видишь,
Пробывавъ у тѣлѣ, и судити буде
и нашему тѣлу, купно и всѣ люде.
И велитъ безъ грѣха христіанствовати,
абысьмо достойни Его оглядали.
Кровь Его святая рабомъ Его чистецъ
и покаяніе грѣхови есть конецъ.
А чому жъ розбойникъ до чистцу не посланъ
и во раю быти со Христомъ обѣцянъ?
Але кого жъ Христосъ до чистцу одославъ,
абы кто по смерти покуту преймовалъ?..

Загароўскі зборнік


Hosted by uCoz