Гісторыя Беларусі IX-XVIII стагоддзяў. Першакрыніцы.


Загароўскі зборнік. "О гонении на святую Церковь"

Каинъ и Авель двѣ церкви значили,
иже изъ Адама сыны ся родили,
Которыи Богу офѣры принесли
и молитвы свои къ Богу вознесли.
Але грѣшный Каинъ Богу не угодивъ
и лукавымъ сердцемъ къ нему приходивъ.
Авель же предъ Богомъ простоту указавъ,
и Богъ его дары на офѣру принявъ.
А коли молитвы Авель Богу отдалъ,
Каинъ его заразъ убити помышлялъ.
И по маломъ часѣ онаго умертвилъ,
але и Богъ его праведно показнилъ,
И мерзскую жертву онаго отразилъ,
егоже молитвы Вышній не возлюбилъ,
иже по зависти Авеля погубилъ,
И братоубійство на земли сотворилъ,
и кровь праведную, яко воду, пролилъ.
И нынѣ таковы Каиновы внуки,
выникаючи въ остатніи вѣки,
Иже снопы злостей на жертву влагаютъ
и души праведныхъ хитро погубляютъ,
Славицею людскою себе заслонили
и Христово имя себѣ прилучили,
Але суть далече отъ святаго пути,
и въ беззаконіи навыкли пребыти.
Свою честь и славу на земли коренятъ,
а славы Божей любити не хотятъ.
Нарекли на земли славно ихъ имена,
а память смерти имъ не воспомянена.
И грады и села тысящьми собрали,
а Христовы слуги смѣле ся позвали.
Хотячи и больше и землю посѣдати,
и во дни, и въ нощи мамону стяжати.
Але Богъ есть святый и злыми ся брыдитъ,
иже своя враги вовѣки погубитъ,
Любитъ за насъ чистую пріяти офѣру,
и кажетъ чистую заховати вѣру.
Безъ ереси и грѣха Богу ся явѣмо
и послушаніемъ Онаго почтѣмо.
За послушаніе царство намъ даруетъ,
за преслушаніе жъ муки уготуетъ.
Яко Авель, терпѣмо от убійцы брата,
и будетъ молитва предъ Вышнимъ пріята.

Загароўскі зборнік


Hosted by uCoz