Гісторыя Беларусі IX-XVIII стагоддзяў. Першакрыніцы.


Загароўскі зборнік. "На злую едность"

Нехай же дружатся съ Каиномъ римляне,
и положитъ ихъ Богъ въ такое же каранье,
Нехай же ихъ страхи насъ не отлучаютъ
отъ любви Христовы, аще и вбиваютъ.
И даровъ и лестей отъ нихъ не пріймѣмо,
и Божей славы тлѣннымъ не дадѣмо.
Слышите, слышите, всѣ купно народы,
и зъ еретиками не мѣвайте згоды.
Не въ палатахъ златыхъ Господа шукайте,
але Его зъ неба славно ожидайте.
Ложь бо человѣча съ Богомъ не царствуетъ,
и лесть неправедныхъ скоро погибаетъ.
Кто милуетъ Христа, на прелесть не ходи
и во терпѣніи Оному угоди.
Остатніи вѣки, але ты спасайся,
и до папѣзской купи не злучайся.
И страхомъ и даткомъ уловленъ не буди
и доброту Христову въ сердцѣ соблюди.
Вѣси, яко тебе за кровь свою купилъ,
абысь къ противному Его не отступилъ.
Цѣну себе далъ Господь, себе жъ Ему продай,
и тѣло, и душу Его ради отдай,
Поминай, поминай малость твоего гроба
и якъ въ немъ истлѣваетъ земная оздоба.
Фарбованыхъ словесъ не прійми во слухи,
абы твои врази не имѣли утѣхи.

Загароўскі зборнік







Hosted by uCoz