Гісторыя Беларусі IX-XVIII стагоддзяў. Першакрыніцы.


Загароўскі зборнік. "Како Андрей, Святый Апостол, пришел в Киев град к невѣрным"

Егда вознесеся Господь на небеса
и егда яви намъ многіи чудеса,
Зъ горы оливнои отъ земли взыйде,
иже исъ плотію судити насъ прійде.
Тогда ученицы всѣмъ проповѣдали,
народомъ и царемъ о немъ возвѣщали
И во страны мiра слово приносили
и отъ злои лести къ Богу приводили.
Всю землю на части собѣ подѣлили
и евангеліемъ людей просвѣтили.
Отъ нихъ же бысть св. Андрей первозванный,
отъ числа ученикъ Христовыхъ избранный,
Изъ Іерусалима въ Византію дойде
и оттуда паки во Россію пріиде.
Таже во градъ Кіевъ по Днѣпру странствова
и посреди поганъ святый крестъ знамена.
На горахъ Кіевскихъ молитву сотворивъ,
дабы тамъ Господь благодать отворивъ,
Дабы имя Его въ Руси величано,
дабы христіанство онымъ даровано,
Иже о идолехъ были упражнени
и во зловѣріи бѣсомъ ослѣплени,
Дабы вже бездушнымъ престала офѣра
и православная возсіяла вѣра.
Вострубивъ начало проповѣдь святую
и принесъ въ Россію новину благую.
Якъ скарбъ небесный на полунощъ принесъ
и Христово имя пречестное вознесъ.
И нынѣ хвалитъ тя полнощная страна,
иже отъ идоловъ къ Богу призвана.
Прославляй Господа повсегда, Россіе,
ижъ благовѣріе въ тобѣ процвѣтае,
Иже красуешься святыми церквами
и Богови служишь чистыми жертвами.
Великая Россія ажъ до океана
за Володимера свято просвѣщенна.
Воспоминай труды апостоловъ святыхъ,
посланнаго к намъ, и прочихъ другихъ.
Святое начало отъ нихъ намъ явленно,
яко отъ самого Бога повелѣнно,
Яко маемъ спастися въ благомъ послушенствѣ
и не изволяймо во злыхъ отщепенствѣ.
Которыи плотне насъ порабощаютъ
и до отступной власти потягаютъ.
Не наши суть пастыри западныи отцы,
не намъ наставницы папѣзскіи ловцы.
Не намъ духовницы отметники вѣры,
иже опрѣсноками приносятъ офѣры.
Не наши пастыри церкви супостаты,
иже ускакуютъ тыномъ, а не враты,
Иже суть не кротци и якоже волци,
и злопрехитрыи людемъ душегубцы.
Не таковъ былъ Господь нашъ, иже нашъ Спаситель,
и Андрей-апостолъ, россійскій учитель,
Яко же влоскіи папины присланцы,
иже будутъ по семъ изъ неба выволанцы.
Нѣсть бо ихъ духъ со Богомъ, но земная мудрость,
которая творитъ Богу непокорность.
Мы же вонимаймо Христови вгожати
и святое имя Его величати.
И сохранимъ твердо гонимую вѣру,
и отбѣгаймо мерзскую офѣру.
И бѣды, и страхи ихъ скоро минаютъ,
которыи нынѣ на насъ повставаютъ.
Ибо и Господь нашъ много за насъ страдалъ,
и намъ терпѣнія самъ образъ прописалъ.
Тажа святый Андрей крестную смерть пріялъ,
во Патрехъ Ахайскихъ за Господа страдалъ.
Христови благій рабъ и мірови ловецъ,
и церквамъ ахайскимъ былъ духовный отецъ.
Не бѣ въ немъ гордости, ниже златолюбства,
але намъ оставилъ чины братолюбства,
Всему христіанству и Кіеву-граду,
богоизбранному россійскому стаду.
На вѣчныи лѣта церковь нынѣ стоитъ,
храмъ честного креста, въ немъ же ся Богъ славитъ.
Если жъ насъ Богъ пріялъ, и къ Нему прибѣжимъ
и теплую милость къ Нему умножимъ.
И мужи, и жены, и дѣти, и старцы,
всѣ православныи братія и отцы,
Ласкове лице Христово узрите,
коли въ день судный предъ него прійдете.
Яко же бо звѣзды изъ неба упали,
тако и отступницы Востоку отпали.
Но слава Христови, иже насъ спасаетъ
и отъ еретиковъ вѣрныхъ заступаетъ.
По лѣтехъ же мнозѣхъ свѣтъ Руси возсіявъ,
князь кіевскій, паганинъ, Христови увѣривъ,
Володимеръ, егоже патріарха крестилъ,
кгды отъ идольскои темности отступилъ
и себе и люди о Христѣ просвѣтилъ.
И за молитвами Андрея святого
вѣруемо нынѣ въ Бога живого.

Загароўскі зборнік







Hosted by uCoz