Гісторыя Беларусі IX-XVIII стагоддзяў. Першакрыніцы.


Загароўскі зборнік. "Племени Рускому наказание"

Отцы ваши вѣру святую любили
и святыи церкви честно украшали.
Отцы ваши посты святыи хранили
и братолюбіе и милость ширили.
Отцы ваши дѣла добрыи творили
и Божіей церкви усердно пріяли.
Отцы ваши во ересь не приступовали
и въ благочестіи души ихъ спасали.
Святыхъ патріарховъ, яко отцевъ, чтили
и благословеньство отъ оныхъ пріймали.
Отцы ваши святыхъ наукъ ся учили
и отъ погибельныхъ себе отлучили.
А чому жъ вы ими есте погордѣли
и на зловѣріе себе измѣнили?
Если погубите души для мамоны,
вже не помогутъ вамъ римскіи законы,
И не схочетъ Христосъ объ васъ уже знати,
если умыслите Его отступати.
Нехай вѣрятъ, яко рачатъ, папѣзскіи дѣти,
але вы въ такіи не падайте сѣти.
Не бойтеся, малая Господня чредо,
упасетъ вы Христосъ цѣло свое стадо.
Разъ есте крещени, любиміи друзи,
мужайтеся нынѣ о преблагомъ Бозѣ.
Отъ втораго креста, ереси, бѣжѣти
и отъ прелестниковъ себе стережѣте.
Добрую маете вѣру и науку,
и помощь Божію, всесильную руку.
Маемо погоду Богу угодити
и Цареви царемъ любѣмо служити.
Хто васъ отлучаетъ отъ Христа и правды,
того не пріймуйте лукавои рады.
Если бы и ангелъ не такъ проповѣдалъ,
яко же Христосъ съ апостолы подалъ,
Святое насъ письмо учитъ не пріймати
и кламливымъ устамъ вѣры не давати.

Загароўскі зборнік


Hosted by uCoz