Гісторыя Беларусі IX-XVIII стагоддзяў. Першакрыніцы.


Загароўскі зборнік. "О святых тѣлах печерских"

Маетъ земля ваша и святыи тѣла,
во славномъ Кіевѣ, ихъ же слава цѣла.
Вже отъ шести сотъ лѣтъ въ печерахъ нетлѣнни
святыи постницы по смерти явленни.
Преподобный Антоній, инокомъ начальникъ,
общаго житія по Бозѣ наставникъ.
Блаженный Феодосій, ангельскій сожитель,
игуменъ братіи, Христови ревнитель.
И множество братіи святая дружина,
яко благополучная Божая маслина,
Отъ святои горы ученіе мѣли
и на высокое житіе доспѣли.
И ясны и славны ихъ подвиги стали,
и тыи истинно Господа познали.
Святыхъ молитвами вы нынѣ живете
и ихъ наслѣдуйте и такъ ся спасете,
Пречестно бо они Христу угодили,
иже съ любовію за насъ ся трудили.
Побачьте очима, кто письму не вѣритъ,
и самыми дѣлы нехай ся увѣритъ.
Тыи не римскому костелу служили,
але патріарховъ святыхъ наслѣдили.
И то вамъ есть, Руси, печать христіанства
принесенный овоцъ въ началѣ съ поганства.
Якъ честный даръ Богу, блаженныи рабы,
отъ вашеи персти во небесномъ стадѣ.
Шестьсотъ лѣтъ минаетъ, а ихъ чуда славны
и до суднаго дня будутъ свѣту явны.
Подземныи мученицы горы постигали,
постомъ и працами тѣла изсушали.
Преже смерти тѣла земли предавали,
кожи ихъ до костей живыхъ присыхали.
Потъ чола своего Богу жертвовали
и слезами лице свое омывали,
Чудами своими прославили Бога —
отожъ вамъ за ними святая дорога
есть уготована, и по ней шествуйте,
и во святой вѣрѣ отеческой стойте.
Не ослабѣйтеся страшками гнилыми,
ани зводитеся науками злыми.
Памятайте оный ликъ отъ русскихъ рожаевъ,
которыи были святыхъ обычаевъ.
Господь ихъ зоставилъ на вашу науку,
да пожелаете честному ихъ лику.
И вѣру правую и дѣла благіи
заховайте Богу, дары дорогіи.
А хто жъ васъ оскорбитъ, кгды Богъ потѣшаетъ
и святыми усты радость обѣщаетъ?..
И хто жъ васъ убіетъ, аще Господь живитъ,
и святый хранитель отъ злого хранитъ?..
Не ужасайтеся въ послѣднее время,
одно облегчайте грѣховное бремя.
Отъ любви Божія да васъ не отлучатъ,
аще и ранами и огнями мучатъ.
Ревность апостоловъ въ сердцахъ роспалите
и вѣрность ко Богу щире покажите.
Вамъ то честь и слава за вѣру вмирати
и по семъ будете зъ Богомъ пробывати.
Немашь тамъ зависти, и гордость не буде,
и Божій зъ Богомъ, и зъ ними Богъ буде.

Загароўскі зборнік


Hosted by uCoz