Гісторыя Беларусі IX-XVIII стагоддзяў. Першакрыніцы.


Загароўскі зборнік. "До иноковъ Руских"

Насѣню Божому священная земле,
нехай ваша душа Господа подъемле.
Будьте господою всесвятого Духа,
явитеся людемъ вѣрная утѣха.
И дѣломъ, и словомъ будьте совершенни,
въ молитвахъ и постѣ будьте украшени.
Вѣру утвержайте, церкви не зражайте
и для имѣнія душъ не продавайте.
Будьте предтечами братіямъ спастися,
и кождый Христови любовію смирися.
Претерпити той вѣкъ, скоро бо минаетъ,
угодите Богу, Иже васъ вѣнчаетъ.
Щастливыи есте, при вѣрѣ стойте
и себе и многихъ Богу приведите.
За черныи вретища будете прекрасны,
предъ Царемъ небеснымъ и честны и ясны.
Нынѣ скитайтеся, а тамъ почіете
и со ангельскими лики поживете.
Не погоршайтеся, ижъ злость начальствуетъ,
поневажъ надъ вами Христосъ царствуетъ.
Не скорбите о скорбехъ, збирайте въ небѣ,
и не угожайте тѣлесной потребѣ.
Играйте душами, Богъ васъ избираетъ
и вашу терпливость часто назираетъ.
Не маете женъ и чадъ, яже суть отъ плоти,
але зъ вами не могутъ царове зровняти.
Чада ваши будутъ, ихъ же вы спасете
и яже въ чистоту другихъ приведете.
Великая вамъ слава передъ Богомъ дана,
и царская столица есть уготована.
Ваша нынѣ глава Христу колесница,
и уста и языкъ святая скарбница.
Чистую дань Богу, хвалу отдайте
и богомысліемъ помыслы красите.
Отчизны на земли мѣти не желайте,
и бѣды и скорби любовно пріймайте.
Нынѣ будемъ странны на земли пришельцы,
держимъ незлобіе, якоже младенцы.
Нынѣ будемъ убози, да обогатѣемъ,
яко да со Христомъ царство имѣемъ.
Не чудимся, братіе, ижъ злыи владѣютъ,
сіи бо вѣчной славы отпадаютъ.
Понеже святіи вся нынѣ презрѣли,
и честь, якоже дымъ, себѣ вомѣнили.
Господь не замедлитъ и прійдетъ воскорѣ,
отверзетъ вамъ славы царства Его двери.
Якъ добрыи рабы, будьте нынѣ вѣрны,
и чисты душею и сердцемъ смиренны.
И словесы и дѣлы, во славу Христови,
явитеся вѣрны Вышнему Цареви.
Минаютъ бо скорби и радость приходитъ,
и прелесть мірская скоро мимоходитъ.

Загароўскі зборнік


Hosted by uCoz