История Беларуси IX-XVIII веков. Первоисточники.


Источник: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд. Мн., 2000. С. 14-16.

В этой книге житие опубликовано по списку Стишного Пролога XVI в., хранящемуся в Российской национальной библиотеке в Санкт-Петербурге, фонд "Общество любителей древней письменности", F. 212, листы 299 - 300 об.

Варианты и дополнения в квадратных скобках даны А.А. Мельниковым по другому списку - Прологу XIV-XV веков, опубликованному в издании: Никольский Н.К. Материалы для истории древнерусской духовной письменности. СПб., 1907. С. 62-64.

В той же день память иже в святых отца нашего Кирила, епископа Туровского.

Съй бе блаженный Кирил рождение и въспитание града Турова, в Рустей стране тако нарицаема, богату родителю сын. Но обаче не любляше богатьства, ни славы тленныа мира сего, но паче всего прилежаше божественных писаний, добре извыче святых книг учению. По времени же отшед в монастырь и бысть мних. И паче всех Богови работаше, постом и бдением [вариант: пеньем] удручая тело свое, сътвори себе чисто приателище Святому Духу. И мнозем на ползу бысть, уча и поучая мнихы в покорении и в послушании быти игумену и того имети, яко Бога, и при всем его слушати. Чернец убо, иже не имеет послушаниа к игумену, якоже обещася, таковый не может быти спасен.

По сем блаженный, на болшая подвигы желая, в столп вшед, затворися и ту пребысть неколико время, постом и молитвами паче себе тружаяся. И многа божественаа писаниа изволи, славен бысть по всей стране той. И молением князя и людий того града [добавление: возведен был на стол епископскый и] от митрополита поставлен бысть епископом граду Турову, еже есть близ Киева. Бысть добре подвизаяся в Церкви Божий.

Феодорца же еретика епископа, за укоризну тако нарицаема, сего блаженный Кирил от божественных писаний ересь обличи и проклят его. Андрею же Боголюбскому князю многа посланиа написа, [добавление: книги написа] от евангельскых и пророчьскых писаний, яже суть чтомы на праздникы Господьскыа и ина многаполезна словеса: яже к Господу молитвы и похвалы многым святым, сим вся и ина множайша написав, церкви предаст. И канон великый о покаании сътвори к Господу по главам азбуки, иже и доныне держат вернии рустии людие [добавление: вся просвещающи и веселящи].

И тако, доброчестиве пожив и благочестно добре порученное ему стадо упас, преставися в вечный и бесконечный живот. Приидете днесь, братие, похвалим своего святителя, глаголюще ему: Радуйся, святителю честный и учителю нашь, другий Златоуст, иже нам в Руси паче всех восиа, радуйся, святителю, иже [добавление: святым и] пресветлым [вариант: тресветлым] учением своим конца рускыа просветив! Радуйся, яко солнце, омраченныа и темныа богоразумием просвещаа! Молю ти ся, святителю, малыа си словеса приносяще: моли о нас Вседръжителя, Емуже ныне предстоиши с дръзновением, от належащых бед и томлениа поганьскаго избавитися, от безбожных агарян, присномучащих ны. Да получим милость молитвами твоими, грехом отдание и присносущих благ наслаждение в оном веце!


сервер купить киров        архитектурная визуализация        autocad 2015

Hosted by uCoz